WAZIRI Mkuu wa zamani wa Tanzania, Frederick Sumaye amewataka
wananchi na wadau wa demokrasia kutochoka kukemea rushwa katika kupata
viongozi kwani inawafanya kuwa wapofu na kudumaza maendeleo.Aliyasema hayo wakati akishiriki harambee ya kuchangia ujenzi wa ukumbi wa parokia ya Mawella, Jimbo Katoliki la Moshi, mkoani Kilimanjaro.
“Ndugu Paroko, naomba usichoke kukemea rushwa na ufisadi na maovu mengine yote yaliyokatazwa katika Biblia Takatifu maana huo ni wajibu wako kama ulivyo wajibu wangu na wajibu wa kiongozi yeyote mwingine ...” alisema Sumaye.
Alisema anashangazwa na kauli za sasa ambazo zinaonesha dhahiri kwamba baadhi ya maeneo na hata katika baadhi ya makundi kuna mwenendo unaonesha kujipanga kwa wanaowania uongozi kwa staili ya matumizi ya fedha.
“Fadhila zimeanza kuwa nyingi katika baadhi ya sehemu na kwa baadhi ya nafasi hasa nafasi za juu; na wapiga kura tayari wameanza kupigwa mnada na kupangiwa bei kulingana na uhodari au umuhimu wa nafasi aliyonayo mhusika,” alisema Sumaye na kuongeza kuwa mambo hayo machafu hayatakiwi kufumbiwa macho.
Alisema kwamba vita dhidi ya rushwa katika uongozi ni kali na Watanzania wasipoangalia sauti za wanaopigana inaweza ikafifishwa na kelele za wanaonufaika na rushwa hizi za nyakati za uchaguzi.
Sumaye alisema pamoja na watu kukerwa na hotuba zake za kukumbusha umuhimu wa demokrasia kutobanwa na fedha, hazungumzi hivyo kwa kuwa anataka uongozi mwaka 2015, lakini anasema hivyo kwa kuwa ni jukumu lake na la Watanzania wote kupambana na rushwa kwani hata kwenye vitabu vitakatifu imeelezwa dhahiri kuwa rushwa hupotosha viongozi.
Akinukuu kifungu cha Biblia, alisema: “Biblia katika Kutoka 23:8 inasema, “Nawe usipokee rushwa; kwani hiyo rushwa huwapofusha macho hao waonao, na kuyapotoa maneno ya wenye haki.”Hivi hao wanaotakiwa kuona ni wakina nani? Hao bila shaka ni viongozi wetu kwa sababu kuongoza ni kuonyesha njia.
Kama sote tunaamini Biblia Takatifu na inasema rushwa hupofusha macho hao waonao na wewe na mimi tukamchagua kiongozi mla rushwa, au mtoa rushwa au anayewanunua wapiga kura, hivi huyo kweli atatuongoza tukafike tunakotaka kufika?”
Aliongeza kusema; “Ukikemea tu rushwa basi utapachikwa sababu nyingi zisizohusika ikiwemo ya kugombea urais mwaka 2015.
Nasema katika hili, suala la kugombea au kutogombea urais mwaka 2015 si sababu. Vita yangu dhidi ya rushwa siyo ya leo. Rekodi zangu zinaonesha nimepambana na rushwa wakati wote nikiwa madarakani, nilipotoka madarakani na sasa naendelea na vita hii na sitachoka.“
Katika kuelezea ubaya wa rushwa, Sumaye alitoa mfano wa kejeli inayotupwa kwake na kundi moja la wanasiasa kwamba hafai kushika madaraka kwa kuwa ni masikini.
“Kuna jamaa moja, kiongozi mwanasiasa aliwakuta watu wapenzi wangu wananizungumza tu akawaambia huyo Sumaye ni maskini atawapa nini? Jiungeni na kambi ya fulani atawapeni fedha nyingi na shida zenu zitaisha. “
Alisema ingawa umasikini si sifa ya kuwa rais, rushwa si mbadala wake. “Kama tunafika sasa kwenye utaratibu wa kusifiana kwa viwango vya rushwa vinavyotolewa na tunavyopokea, tunaipeleka nchi pabaya,“ alisema Sumaye na kuongeza kuwa yeye hajawahi kutangaza kugombea urais ingawa yeye si masikini ila hawezi kukana ukweli kuwa hana fedha za kuwanunua wapiga kura wala utaratibu wa kuwanunua hautaki kwa maana ni rushwa.
Aidha alisema pamoja na kejeli hizo, anaona cha muhimu watu hao ambao wanaibia taifa kwa ufisadi ni vyema wakishaiba wasiseme, kwani Watanzania hawafurahishwi na hali hiyo, inawaudhi na inawauma na ipo siku wataikataa.
Sumaye alisisitiza kuwa utaratibu wa kuwekwa au kuchaguliwa katika nafasi bila vishawishi vya rushwa uliotumika tangu enzi za kale ndiyo unaotakiwa kutumika hadi leo, labda kwa kuboreshwa kutegemeana na mazingira lakini siyo kudhoofishwa au kuchakachuliwa kwa rushwa.
Waziri huyo akizungumza kwa umakini alisema kuwa kama taifa litakiuka taratibu sahihi za kuwapata viongozi na badala yake wapiga kura wakanunuliwa kwa kupewa rushwa, basi wajue na wakubali kuwa watapatikana viongozi waliopofuliwa na ama utoaji au upokeaji wa rushwa.
Aliwataka Watanzania kuungana na Rais Jakaya Kikwete katika juhudi anazofanya za kupambana na uozo wa rushwa katika jamii yetu, hasa rushwa nyakati za chaguzi.
Licha ya kuelezwa kuna kampeni za chini kwa chini kwa watu wanaotaka madaraka katika uchaguzi mkuu wa mwaka 2005, taifa pia linajiandaa kwa uchaguzi wa Serikali utakaofanyika mwaka kesho, yaani mwaka 2014.
Katika harambee hiyo, jumla ya milioni 83 zilipatikana kwa ajili ya ujenzi wa ukumbi huo wa Parokia.HABARILEO
0 comments:
Post a Comment