Mola wetu maridhia, wawajua maadawa,
Kinga twakutegemea, salama ndani tukawa,
Ya kwake aanayezua, twakuomba kumng’oa,
Huwa ana sura nyingi, kawaida ya adui !
Haki budi kutumia, ukweli kujipatia,
Chama kiweze jifua, na kuondoa madoa,
Kisafi kikabakia, huko tunakoelekea,
Huwa ana sura nyingi, kawaida ya adui!
Wanachama mwatakiwa, jambo hili kutambua,
Hubadilika adawa, muhali kumtambua,
Nje anakoanzia, ndani huweza ingia,
Huwa ana sura nyingi, kawaida ya adui!
Chama anakitambua, taratibu na sheria,
Umoja ndiyo silaha, ubinafsi hadaa,
Peke ukijichepua, uchama hukupotea,
Huwa ana sura nyingi, kawaida ya adui!
Chama kinatangulia, na wengine twafatia,
Vikao tunavijua, na hatua kwa hatua,
Uchama kufanikiwa, budi chamani kukaa,
Huwa ana sura nyingi, kawaida ya adui!
Mashabiki twawajua, nje wanaojikalia,
Waweza kukusifia, kichwa wakakupatua,
Kinapozidi kukua, huweza kukuumbua,
Huwa ana sura nyingi, kawaida ya adui!
Unyenyekevu ni dawa, lazima kuitumia,
Hii ukishajinywea, nafasi huitambua,
Hutokubali hadaa, vichwani kutupandia,
Huwa ana sura nyingi, kawaida ya adui!
Chama chataka ridhaa, ya wengi iliyokuwa,
Hoja zikishatolewa, na kura kuzingatiwa,
Nje ukenda yazua, kitu gani yakufaa?
Huwa ana sura nyingi, kawaida ya adui!
Wazaini wamejaa, wajua watu tumia,
Mbegu wakajipandia, kusambaratisha nia,
Watu wakijidhania, stahili wafikia,
Huwa ana sura nyingi, kawaida ya adui!
Kumbe wanachotakiwa, ni chama kukisumbua,
Au kiende umia, na pengine kulemaa,
Au hata kukiua, yao yakafanikiwa,
Huwa ana sura nyingi, kawaida ya adui!
Tunakuomba Jalia, chama kukiangalia,
Mkombozi mtegemewa, Tanganyika angojewa,
Uongozi kuutwaa, hali zetu bora kuwa,
Huwa ana sura nyingi, kawaida ya adui!
S.M Januari Mosi, 2014,
Dar es Salaam.
HIMID NYOMBWE, AKIWA KAZINI KATIKA MAJUKUMU YA KAZI
0 comments:
Post a Comment