KASHFA MPYA YAIBUKA BODI YA PSPTB

BODI ya Wataalamu wa Ununuzi na Ugavi (PSPTB) imeingia tena katika kashfa baada ya kuficha matokeo ya wahitimu zaidi ya 2,5000 waliofanya mtihani wa kuhitimu mafunzo Novemba, 2012. 

Matokeo ya wahatimu hao yalitarajiwa kutangazwa Desemba, mwaka jana kama ilivyo kila mwaka lakini hadi sasa bado hayajatangazwa kwa sababu ambazo hazijawekwa wazi.
Kwa mara ya kwanza bodi hiyo ilipata kashfa ya kutoa ajira kinyemela na kusababishwa Mkurugenzi wake, Dk. Clemence Tesha pamoja na maofisa wengine kufikishwa mahakamani Juni, mwaka jana.


Dk. Tesha na wenzake walifikishwa katika Mahakama ya Hakimu Mkazi Kisutu kwa kutumia madaraka yao vibaya kwa kumuajiri Amani Ngonyani kama Meneja Maendeleo na Biashara wakati hakusajiliwa kama mtaalamu na kukiuka kifungu cha 46 (1) cha sheria ya NBMM namba 23 ya 2007.

Bodi hiyo ambayo imetokana na iliyokuwa Bodi ya Taifa ya Usimamizi wa Vifaa (NBMM) imekuwa ikilalamikiwa kwa kushindwa kutumiza majukumu yake ipasavyo.

Gazeti hili juzi lilipokea malalamiko kutoka kwa baadhi ya wahitimu wa elimu ya fani ya ununuzi na ugavi kwamba matokeo yao yameshindwa kuwekwa wazi jambo ambalo limewanya kupoteza mwelekeo.

Wahitimu hao walisema wamekuwa wakifuatilia PSPTB kupata matokeo yao lakini hawaelezwi sababu za msingi tofauti na kuahidiwa kutangazwa muda wowote.

MTANZANIA ilifika katika ofisi za PSPTB kupata ufafanuzi lakini baadhi ya maofisa wa mamlaka hiyo hawakuwa tayari kuzungumzia.

Maofisa hao ambao hawakutaka kutaja majina yao walianza kusukumia mpira akiwamo anayehusika na mitihani akidai kuwa majibu anayo lakini hana kibali kutoka kwa Dk. Tesha ambaye hakuwapo ofisini.

Hata hivyo baada ya mvutano huo, Ofisa mmoja kutoka idara ya fedha aliamua kuzungumza na MTANZANIA kwa ufupi kwa sharti la kutotajwa jina lake.

“Ni kweli mtihani ulifanyika Novemba, mwaka jana na matokeo bado hayajatangazwa Desemba kama ilivyozoeleka kila mwaka.

“Si kwamba tunapenda kushikilia matokeo haya la hasha, kuna sababu kadhaa zimesababisha hali hii kutokea lakini hadi sasa PSPTB tunafanya jitihada za kuokoa wahitimu hao taaluma yao isipotee hivi hivi.

“Kubwa zaidi ni kwamba bodi iliyopo sasa umri wao ni mkubwa kulingana na sheria zetu ndio maana inashindwa kukaa na kubariki matokeo hayo, suala la umri huo lipo juu yetu na taarifa hiyo tayari limefikishwa wizarani ili kufanyiwa kazi.

“Hadi sasa bodi haina mamlaka ya kutangaza matokeo hayo hadi itakapopatikana nyingine kisheria lakini kutokana na hali kutokea tumefanya marekebisho katika sheria za PSPTB kuepusha kurudia tatizo kama hilo.

“Sasa marekebisho tuliyoyafanya tumeyapeleka wizarani ili kupata baraka na kama yakikubaliwa yatakuwa suluhisho hapo baadaye na si kwa tatizo ambalo tayari limejitokeza sasa,” alisema ofisa huyo.http://www.mtanzania.co.tz

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari