MBUNGE WA CCM AISHUKIA SERIKALI NA MATESO YA KINAMAMA NA VISIMA VYA MAJI

NITAOMBA niende na Waziri (Profesa Jumanne Maghembe) au naibu wake (Dk Binilith Mahenge)  ili wakawaeleze wananchi  wa Morogoro ni lini watawapatia maji kwa kuwa wamechoshwa na visima hivi mdundiko,”

Mchungaji Lwakatare.

Dodoma. Ni kilio kila kona.  Hivi ndivyo unavyoweza kuuelezea mjadala wa Bajeti ya Wizara ya Maji na Umwagiliaji uliowasilishwa bungeni mjini Dodoma jana.

Vilio hivyo vya wabunge waliochangia mjadala huo ndivyo vilivyomfanya mbunge wa Viti Maalumu (CCM), Mchungaji  Dk Getrude Lwakatare alieleze bunge kuwa wananchi wa Mkoa wa Morogoro, hususan maeneo ya Ifakara na Kilombero wamechoshwa na ukosefu wa maji ambao umewakumba kwa muda mrefu. 

Dk Lwakatare akaeleza kuwa wananchi hao wameishi kwa miaka mingi na uhaba huo, wakitegemea visima vya kusukuma, maarufu kama visima mdundiko na kuitaka Serikali ihakikishe inawapatia ufumbuzi wa kero ya maji.

Katika mchango wake, Mchungaji Rwakatare alisema  kuwa  wanawake na watoto wa Ifakara na Kilombero wamekuwa katika wakati mgumu kutokana na kukosekana kwa maji licha ya kuishi jirani na mito inayotiririsha maji kwa muda wote. 

“Ni lazima Serikali ihakikishe katika bajeti ya mwaka huu inawapatia wananchi hao maji, wamechoshwa na visima hivi mdundiko.

Nitaomba niende na Waziri (Profesa Jumanne Maghembe) au naibu wake (Dk Binilith Mahenge)  ili wakawaeleze wananchi  wa Morogoro ni lini watawapatia maji kwa kuwa wamechoshwa na visima hivi mdundiko,”alisema Mchungaji Lwakatare. 

Aliongeza kuwa kuna kila sababu ya kuhakikisha wananchi wanapata maji kwa kuwa ni wajibu wa Serikali kufanya hivyo. Mbali na Lwakatare, Mbunge wa Viti Maalumu (Chadema), Muhonga Said  Ruhwanya aliililia Serikali na kuomba  iwasaidie wananchi mkoani Kigoma kupata maji kwa kuwa maji ni uhai ambao kila mtu anahitaji.

“Kule Kigoma kuna vijiji havina maji tunaomba mvisaidie muwasaidie na watu wa Mwandiga ili waweze kupata maji kwa haraka,”alisema. 

Naye Mbunge wa Moshi Vijijini(CCM), Dk Cyril Chami aliwataka wabunge kuacha kumlalamikia Waziri wa Maji na Umwagiliaji na badala yake alisema ni muhimu wakakaa chini na kufanya uamuzi kwa pamoja.

“Hakuna cha kumlaumu waziri hapa, wabunge tuache kulalamika, tukae chini tufanye maamuzi ambayo tunayahitaji,”alisema Dk Chami na kuongeza: “Kuna kiongozi mmoja hapa nchini amekuwa akisema tunahitajika kufanya maamuzi magumu hivyo tufanye.”

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari