KWA mara nyingine hotuba ya kambi ya upinzani jana ilichafua hali ya hewa bungeni, hatua iliyolazimu Naibu Spika, Jobu Ndugai, kuliahirisha Bunge. Hotuba hiyo inadaiwa kukidhalilisha Chama cha Wananchi (CUF), kwamba kinaunga mkono sera za usagaji na ndoa za jinsia moja, maneno yanayodaiwa kuleta kichefuchefu.
Baada ya kutokea hali ya kurushiana maneno, Ndugai alilazimika kuahirisha Bunge na hivyo kut
oa fursa kwa Kamati ya Maadili ya Bunge kuijadili hotuba hiyo.
Tafrani hiyo ilijitokeza wakati Msemaji wa kambi hiyo kuhusu Wizara ya Mambo ya Nje na Ushirikiano wa Kimataifa, Hezekiah Wenje akiwasilisha maoni ya kambi yake.
Hata hivyo Wenje ambaye pia ni Mbunge wa Nyamagana, alinusurika kupigwa na wabunge wa CUF baada ya kudai kwamba, hotuba yake imekidhalilisha chama chao.
Wenje alikuwa akisoma maoni ya kambi yake kuhusu Makadirio ya Mapato na Matumizi ya bajeti ya Wizara ya Mambo ya Nje na Ushirikiano wa Kimataifa kwa mwaka wa fedha 2013/14.
Wakati Wenje akisoma hotuba yake, Mbunge wa Mtambile, Masoud Abdalla Salim (CUF), alisimama na kuomba mwongozo wa spika.
Baada ya kupatiwa nafasi hiyo, Mbunge huyo alitumia kanuni ya 68 (1) sambamba na kanuni ya 64 (1) (abc), ambapo alisema:
“Katika hotuba hii ya kambi ya upinzani, ukurasa wa 8, paragraph ya 3 inasema: ‘Kwa upande wa Chama cha CUF, kutokana na itikadi zake za mrengo wa kiliberali ambazo miongoni mwa misingi yake mikuu ni pamoja na kupigania haki za ndoa ya jinsia moja, usagaji na ushoga,” alisema.
Kabla mbunge huyo kumaliza kuomba mwongozo wake, baadhi ya wabunge walisikika wakiguna huku Mbunge wa Nkasi Kaskazini, Ali Keisy akisikika akisema wapigwe wapigwe.
Wakati zogo hilo likiendelea, Masoud aliendelea kuomba mwongozo wake. “Mheshimiwa Naibu Spika, maneno haya hayakubaliki kutolewa ndani ya Bunge hili maana hayana ukweli, huu ni uzushi, uongo, uhuni uzandiki na huu ni ushenzi.
“Imekuwa ni tabia mbaya kama hii, Watanzania walitupa ridhaa ya muda mrefu kuja humu ndani kuzungumza, kwa bahati mbaya kunatolewa lugha kama hizi ndani ya vitabu.
“Mimi nadhani kwa hotuba hii, Chadema waombe radhi, pili wafute kauli yao, tatu kamati ya Maadili ya Bunge ichukue nafasi yake.
“Kama Kamati ya maadili imeona jambo hili ni dogo, CUF itachukua hatua zinazostahili dhidi ya Bunge na Chadema, hatukubali taarifa hii, uhuni huu na matusi haya, huu ni udhalilishaji mkubwa kupita kiasi.
“Ninakuomba Naibu Spika, Chadema wachukuliwe hatua za kinidhamu kwanza wakome, wakome mara mia moja narudia tena kama Bunge hawatachukua hatua, CUF itachukua hatua kwa Bunge na Chadema,” alisema.
Pamoja na kuzuka kwa zogo ndani ya Bunge, Naibu Spika alimpa nafasi Wenje atoe ufafanuzi ambapo hata hivyo wakati akitoa maelezo miguno iliendelea.
“Mheshimiwa naibu spika, with due respect (kwa heshima kubwa) ninaomba wabunge wanisikilize, tunachozungumzia, tunazungumzia mahusiano kati ya vyama vya Tanzania na vyama vya nje ya nchi.
“Tumeeleza kwanza CCM ina uhusiano na vyama gani, Chadema ina uhusiano na vyama gani na misingi ya mahusiano kwa vyama vya Tanzania na vya nje ni ideology (itikadi) zao.
“CCM wapo socialism (ujamaa), CUF wapo liberal na Chadema ni mrengo wa kati na kwa misingi ya liberal……….” Kabla ya kumaliza kuzungumza vurugu zikaanza, kelele za toka toka zilisikika huku baadhi ya wabunge wa CUF wakisimama kumfuata Wenje wakitaka kumpiga.
Baadhi ya wabunge hao ni pamoja na Mbunge wa Konde, Khatib Said Haji, Mbunge wa Ole, Rajab Mbarouk Mohamed, Mbunge wa Mji Mkongwe, Ibrahim Sanya, Mbunge wa Lindi Mjini, Salum Khalfan Barwany na wengine.
Baada ya Ndugai kushindwa kudhibiti vurugu hizo, aliahirisha Bunge hadi jioni na kuitisha kikao cha Kamati ya Bunge ya Maadili kukutana muda huo.
Hata hivyo wabunge hao wa CUF waliendelea kumfuata Wenje licha ya kuzuiwa na baadhi ya wabunge wenzao, huku baadhi yao wakisikika wakitukana matusi ya nguoni.
Mbunge wa Nkasi Kaskazini, Ali Keisy Mohamed (CCM) alisikika akisema ‘mdundeni huyo, leo wapo wachache.
Sauti nyingine zilizokuwa zikisikika ni pamoja ‘mambo ya kishenzi wafanyieni haohao’ huku Mbunge wa Kilwa Kusini, Selemani Bungara (CUF), akisikika akisema: “Hakisomwi kitu chezeni na wabunge wa CCM, sisi tunapiga.”
Wakati huo Wenje alionekana akitolewa nje akisindikizwa na Mbunge wa Mtera, Livingstone Lusinde (CCM), Mbunge wa Musoma Mjini, Vicent Nyerere (Chadema) na askari mmoja wa Bunge.
Wenje alisindikizwa hadi nje ya Ukumbi wa Bunge na kupelekwa katika Ofisi za Kambi ya Upinzani bungeni.
Hali ilivyokuwa nje.
Wabunge wa CUF walikusanyika katika viwanja vya Bunge, huku baadhi yao wakiporomosha matusi ya nguoni dhidi ya Chadema.
Baadhi ya wabunge wa CCM walionekana kuwaunga mkono wabunge hao wa CUF, kwa kupinga kile ambacho kilikuwa kimeandikwa katika hotuba ya kambi ya upinzani.
Kwa upande wake Mbunge wa Konde, Khatib Said Haji akizungumza na waandishi wa habari nje ya viwanja hivyo alisema: “CUF walikuwa tayari kumpiga mtu kuliko kuruhusu hotuba ile kusomwa bungeni,” alisema.
Khatib alisema msimamo wa CUF siku zote unajulikana kuhusu kupinga vitendo vya ushoga na ndoa za jinsia moja, hivyo akashangaa maneno yaliyotolewa.
Hotuba ya Wenje.
“CCM wao wanajiita kuwa wapo mrengo wa kijamaa/kikomunisti na wamekuwa wakipokea misaada mingi sana ya fedha na nyenzo kutoka umoja wa vyama vya kikomunisti ulimwenguni.
“CCM imekuwa ikipokea misada katika nchi kama za Ujerumani kupitia SDP, Uingereza kupitia Chama cha Labour, China kupitia Chama cha Kikomunist, Marekani kupitia Chama cha Democrats.
“Kwa upande wa chama cha CUF, kutokana na itikadi zake za mrengo wa kiliberali ambazo miongoni mwa misingi yake mikuu ni pamoja na “kupigania haki za ndoa ya jinsia moja, usagaji na ushoga.
“Hii ni kwa mujibu wa tangazo lao kwenye mtandao wao wa umoja wa maliberali ulimwenguni, likiungwa mkono na Waziri wa Haki na Usawa wa Uingereza, Lynn Featherstone kutoka chama cha Liberal Democrats.
“Kutokana na umoja huo, CUF wamekuwa wakipata msaada wa kifedha na nyenzo nyingine mbalimbali kutoka kwa vyama hivyo vya mrengo wa kiliberali na msaada wa mwisho ni hivi majuzi Machi 2013, waliposaini makubaliano na chama cha kiliberali kutoka Norway.
“Kambi ya Upinzani Bungeni, inavitaka vyama vyote ambavyo vimekuwa na mahusiano na vyama vya nje viweke wazi mikataba yao na malengo ya mahusiano hayo, ikiwa ni pamoja na misaada ambavyo vimekuwa vikipokea kutoka kwenye nchi hizo,” ilieleza hotuba hiyo.
BUNGE LILIVYOKUWA JIONI.
Bunge liliporudi jioni, Naibu Spika, Job Ndugai alimtaka Makamu Mwenyekiti wa Kamati ya Kinga, Haki na Maadili ya Bunge, John Chiligati kuelezea uamuzi uliofikiwa na kamati hiyo.
Chiligati alisema baada ya kamati kuzungumza na Wenje na mlalamikaji ambaye ni Mbunge wa Mtambile, Masoud Abdalla Salim (CUF, Kamati iliamuru Wenje aombe radhi kwa CUF na maneno yale ya kuudhi yafutwe.
Alisema kwa upande wa mlalamikaji, alikubali mambo hayo mawili yafanyike.
“Baadae Wenje alileta mabadiko ya kitabu cha Kambi Rasmi ya Upinzani katika kamati, hata hivyo hakukuwa na mabadiliko yoyote zaidi ya mabadiliko ya lugha ikiwemo matumizi ya lugha ya kiingereza lakini maneno ni yaleyale.
“Hata pale Kamati ilipomtaka aombe radhi, Mheshimwa Wenje alikataa kwa madai kwamba katika maneno yale hakulenga CUF bali alilenga vyama vya kisiasa duniani vyenye mrengo wa kiliberali.
“Kamati imeamua kiti chako, Naibu Spika kimuamuru Wenje kuondoa maneno na awe muungwana aondoe maneno yake hata kama aliyasema kwa nia njema,” alisema Chiligati.
WENJE APEWA NAFASI.
Baada ya kupewa dakika tano, Wenje alisema ni kweli CUF ilijiunga na vyama vya kiliberali mwaka 1997 na kuonyesha mkataba ambao vyama kiriberali vilikubaliana katika kulinda haki za mtu mmoja mmoja ikiwemo kutambua ushoga na usagaji.
“Ni kweli CUF ni chama cha kiriberali, mheshimiwa Spika, nimedhalilishwa leo, nimetukanwa na wamefanya fujo bungeni, kamati inahitaji nifute maneno ya ukweli, niombe msamaha kwa kosa lipi?,” alihoji Wenje.
MASOUD AZUNGUMZA.
Baada ya maelezo ya Wenje, Ndugai alimpa nafasi mlalamikaji ambaye alisema msimamo wake upo palepale na kama Wenje hataomba msamaha na kufuta maneno yake, wabunge wa CUF hawataruhusu hotuba yake isomwe.
Mbunge mwingine aliyeomba mwongozo ni Mbunge wa Ubungo, John Mnyika (Chadema) na Mbunge wa Mtera, Livingstone Lusinde ambaye alitaka Wenje asisome tena hotuba yake na majadiliano yaendelee.
NAIBU SPIKA AMRUDIA WENJE.
Ndugai alimtaka Wenje kwa mara nyingine kuomba msamaha na kusoma hotuba yake kwa kuruka vipengele vilivyolalamikiwa na CUF.
Wenje alienda mbele na kukubali kuruka vipengele hivyo lakini badala ya kuomba msamaha, aliendelea kusoma hotuba hiyo hali iliyosababisha wabunge wa CUF kusimama.
Naibu Spika ilimlazimu kumkatisha Wenje na kumtaka arudi alipokaa.
“Kwa mara nyingine tena, nalipeleka suala hili katika Kamati ya Haki, Maadili na Madaraka ya Bunge na naliahirisha Bunge hadi kesho na tutakapoendelea na Wizara ya Maendeleo ya Mifugo na Uvuvi,” alisema Ndugai.
0 comments:
Post a Comment