UCHUNGUZI, KIBALI CHAKWAMISHA MWILI WA MANGWEA AFRIKA YA KUSINI KUJA TANZANIA.

Na Rahimu Kambi.

HALI ya usiri ulioendelea kutawala juu ya kifo cha msanii Albert Mangwea na kuanza kuzusha maswali kedekede kutoka kwa wadau wa muziki hapa, mwili wa msanii huyo unatarajia kuwasili nchini Juni 4 mwaka huu.

 

Pamoja na usiri huo kutawala, Kamati ya Mazishi na Shirikisho la Muziki Tanzania, limendelea kuwataka Watanzania kuwa na subira juu ya mwili wake kutokana na sababu mbalimbali zikiwemo za kushughulia suala la kibali cha kusafirisha mwili huo kuja Tanzania.

Msemaji wa Kamati ya Mazishi, Adam Juma kushoto, akizungumza jambo akiwa na Rais wa Shirikisho la Muziki Tanzania, Addo Novemba kulia.

Rais wa Shirikisho hilo, Addo Novemba, aliwahakikishia Watanzania kuwa mwili huo utafika kesho na kuwapa fursa wapenzi wake kuaga siku ya Jumatano, ambapo pia utaelekea mkoani Morogoro kwa ajili ya mazishi yake Alhamis, makaburi yaliyopo Kihonda.

Ngwea alifariki Jumanne ya wiki iliyopita nchini Afrika Kusini, alipokuwa kwenye shughuli zake za kimuziki, ambapo hadi sasa mwili wake upo katika Hospitali ya Dk Hellen alipofia.

Msiba wa Ngwea kwa sasa upo nyumbani kwa kaka yake Mbezi Beach, Kenneth Mangwea, ambaye pia ndio mwenyekiti wa Kamati ya Mazishi yatakayofanyika Alhamis.

Ngwea atakumbukwa na wengi kutokana na mchango wake katika tasnia ya muziki wa kizazi kipya, maarufu kama Bongo Fleva, akitamba na nyimbo nyingi, ukiwamo wa Gheto Langu uliotesa katika vituo vya redio na kulitambulisha jina lake kwa wadau wa muziki.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari