MAN U YATANDIKWA KWAO NA MANCHESTER CITY BAO 6-1.

Manchester City imeizaba Manchester United 6-1 kwenye uwanja wa Old Trafford.

Kinyume na matarajio ya Wengi, Man United walishindwa kabisa kuhimili vishindo vya majirani zao na mahasimu wao wa jadi. Hadi mapumziko City walikuwa wakiongoza kwa goli moja lililofungwa na Mario Balotelli.

Man United walicheza karibu kipindi chote cha pili wakiwa na mchezaji mmoja pungufu baada ya beki Jonny Evans kupewa kadi nyekundu kwa kumzuia Balotelli kwenda kumuona kipa wa United David De Gea.

Baada ya kutolewa kwa Evans, karamu ya magoli ilianza kwa City. Balotelli aliongeza bao la pili katika dakika ya 60. Sergio Aguero akafunga bao la tatu katika dakika ya 69. Edin Dzeko baada ya kuingia kama mchezaji wa akiba alifunga bao la nne katika dakika ya 90, David Silva bao la tano na Dzeko tena kupiga msumari wa mwisho katika filimbi ya mwisho ya mchezo.

Bao pekee la kufutia machozi la United lilifungwa na Darren Fletcher katika dakika ya 81.

Matokeo haya yanaipa City pointi tatu ambazo zinaifanya kuendelea kuongoza kwa pointi tano zaidi ya United.

Katika michezo mingine, Arsenal iliizaba Stoke City 3-1. Gervino aliandika bao la kwanza katika dakika ya 27, ingawa bao hilo lilisawazishwa na Peter Crouch. Hata hivyo Robin Van Persie ambaye alianza bechi katikika mchezo huo aliingia na kufunga mabao mawili.

Everton nayo ikicheza ugenini ilipata ushindi wa mabao 3-1 dhidi ya Fulham. Mabao ya Everton yakifungwa na Royston Drenthe, Luis Saha na Jack Rodwell. Bao la Fulham lilifungwa na Bryan Ruiz.

Bao la kwanza kabisa kwa Yohan Cabaye kuifungia Newcastle limeinyon'gonyesha Wigan baada ya kupoteza mechi yake ya sita ya mfululizo ya ligi kwa kuilaza bao 2-1.

Newcastle ilikuwa na wakati mgumu kutafuta nafasi huku Leon Best nusura aipatie timu yake bao la kuongoza kwa kichwa lakini mpira huo uliokolewa na mlinda mlango wa Wigan Ali Al Habsi.

Newcastle iliimarika lakini Wigan walionekana kwao walichokuwa wakitafuta ni sare hadi Cabaye alipofumua mkwaju wa yadi 20 na bao hilo likadumu hadi mwisho na kuipatia timu hiyo pointi 19 wakiwa nafasi ya nne sawa na Chelsea walio nafasi ya tatu.

Mabao mawili yaliyofungwa dakika za mwisho yameisaidia Sunderland kupata ushindi wake wa kwanza nje ya uwanja wao na kuiacha Bolton ikigaagaa bila pointi msimu huu katika uwanja wao wa nyumbani wa Reebok.

Stephane Sessegnon alikuwa wa kwanza kupachika bao baada ya kuachia mkwaju mkali uliompita mlinda mlango Jussi Jaaskelainen.

Darren Pratley alipata nafasi nzuri ya kusawazisha bao hilo lakini mlinda mlango Simon Mignolet alikaa imara na kuokoa.

Nicklas Bendtner aliihakikishia Sunderland ushindi na pointi tatu baada ya kupachika bao la pili kwa mkwaju wa yadi 10 baada ya kazi nzuri iliyofanywa na Sessegnon.

Nayo Wolves ilibidi ifanye kazi ya ziada dakika za mwisho kuweza kusawazisha mabao mawili baada ya kuwa nyuma na kubanwa vilivyo na Swansea City na kumaliza mpambano huo kwa kufungana mabao 2-2 hali iliyompunguizia joto la moyo meneja wao Mick McCarthy.

Wenyeji hao hadi kipindi cha kwanza kilipomalizika walikuwa nyuma kwa mabao 2-0 na ilionekana dhahiri Wolves wakielekea kupoteza mchezo wa sita mfululizo wa Ligi Kuu ya England.

Danny Graham alikuwa wa kwanza kuwapatia wageni bao la kungoza na muda si mrefu Joe Allen akaipatia Swansea bao la pili.

Lakini mkwaju wa karibu wa Kevin Doyle ulifufua matumaini ya Wolvea kwa kuiandikia timu yake bao la kwanza na mkwaju wa Jamie O'Hara's uliinyima Swansea ushindi na kuisawazishia Wolves na hadi mwisho matokeo 2-2.

Na West Brom ikiwa nyuma kwa bao moja ilijipapatua na kuweza kushinda kwa mabao 2-1 dhidi ya Aston Villa. Aston Villa walilazimika kucheza wakiwa pungufu mchezaji mmoja baada ya Chris Herd kutolewa nje kwa kadi nyekundu katika hali iliyoonekana ni ya kutatanisha.

Darren Bent aliipatia bao la kwanza Aston Villa kwa mkwaju wa penalti kabla Herd kuoneshwa kadi nyekundu baada ya kumfanyia rafu Jonas Olsson ndani ya sanduku la hatari.

Chris Brunt alipoteza mkwaju wa penalti baada ya kufumua mshuti kubwa nje, lakini makosa hayo yalisahaulika haraka baada ya Olsson kusawazisha kwa kichwa kutokana na mpira wa kona.

Bao la pili lililowahakikishia ushindi West Brom lilifungwa na Paul Scharner baada ya kuunganisha mkwaju mkali wa kona.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari