WAKUU WAPYA WA WILAYA NNE KUAPISHWA MOROGORO LEO.

MKUU wa mkoa wa Morogoro, Joel Bendera anatarajia kuwaapisha wakuu wa wilaya nne za mkoa huo kufuatia uteuzi mpya uliotangazwa na Waziri Mkuu Mizengo Pinda hivi karibu katika hafla fupi ambayo itafanyika kwenye viwanja vya Ikulu ndogo ya Morogoro.

Akizungumza na gazeti la Mwananchi mjini hapa, Katibu Tawala mkoa wa Morogoro Eria Ntandu alisema kuwa kuapishwa kwa wakuu hao wapya wa wilaya zitawapafursa ya kuanza kazi mara moja baada ya kuchukua nafasi za watangulizi wao wengine waliopandishwa madaraja na wengine kubadilishwa vituo vya kazi.

Aliwataja wakuu hao wa wilaya na vituo vyao vipya ambao wanatarajia kuapishwa na mkuu huyo wa Mkoa kuwa ni pamoja na Saidi Amanzi – Morogoro, Elias Tarimo – Kilosa, Hassan Masala – Kilombero, Antony Mtaka – Mvomero wakati Fransic Miti ataendelea kubakia kituo chake cha kazi cha wilaya ya Ulanga.

Ntandu alisema uteuzi huo utafanya wilaya nne za mkoa wa Morogoro ziliachwa wazi kwa kipindi kirefu baada ya wakuu wa wilaya hizo kuteuliwa kuwa wakuu wa mikoa akiwemo, Saidi Thabiti Mwambungu aliyeteuliwa kuwa mkuu wa mikoa ya Ruvuma akitokea wilaya ya Morogoro.

Wengine ni Fatma Mwassa aliyeteuliwa kuwa mkuu wa mkoa wa Tabora akitokea wilaya Mvomero na Mhandisi Ernest Ndikolo kuwa mkuu wa mkoa wa Mwanza akitokea wilaya ya Kilombero.

Alisema kuwa kabla ya kuteuliwa kwa wakuu hao wapya wa Wilaya aliyekuwa mkuu wa wilaya ya Kilosa Halima Dendego alikuwa akikaimu wilaya za Mvomero,Morogoro na Francis Mitti alikuwa akikaimu wilaya ya Kilombero kutokana na wilaya hizo kukosa viongozi kwa kipindi hicho ambapo hata hivyo naye Halima Dendego ameteuliwa kuwa mkuu wa wilaya ya Tanga Mjini.

Katibu Tawala huyo alisema kuwa sherehe hizo zinatarajiwa kuanza majira ya saa 5 mei 17 asubuhi na kumalizika majira ya saa 6:30 mchana ambapo zitafanyika katika viwanja vya Ikulu ndogo ya Mkoa wa Morogoro.