BUNGE AIBU TUPU.

WABUNGE WAPOROMOSHA MATUSI HADHARANI http://www.mtanzania.co.tz

TABIA ya wabunge kurushiana matusi wakati wa mjadala wa Bunge, imezidi kushika kasi, baada ya tabia hiyo kuendelea tena jana wakati wa mjadala wa hotuba ya Bajeti ya Ofisi ya Waziri Mkuu kwa mwaka wa fedha 2012/13.

Pamoja na tabia hiyo kuendelea tena jana, wiki iliyopita Mbunge wa Mbeya Mjini, Joseph Mbilinyi maarufu kwa jina la Sugu (CHADEMA), alisema Baraza la Mawaziri linaundwa na mawaziri wapumbavu. Kwa siku ya jana, tabia hiyo ilianzia kwa Mbunge wa Mtera, Livingstone Lusinde (CCM), kisha ikasisitizwa na Mbunge wa Kondoa Kusini, Juma Nkamia (CCM).

Wakati Nkamia akichangia bajeti hiyo na kueleza jinsi asivyokubaliana na vitendo vya udini vinavyodaiwa kuwa katika Chuo Kikuu cha Dodoma (UDOM), Sugu aliingilia kati bila kuruhusiwa na kusema, je Lwakatare.

Baada ya Sugu kusema neno hilo, Nkamia alikatisha kuchangia na akasema:

“Sugu naomba unyamaze mimi ndiye nazungumza, mimi siongei na mbwa naongea na mwenye mbwa,” alisikika Nkamia.

MACHALI AOMBA MWONGOZO 

Mbunge wa Kasulu Mjini kupitia NCCR-Mageuzi, Moses Machali

Nkamia aliposema hivyo, wabunge waliguna na Mbunge wa Kasulu Mjini, Moses Machali (NCCR-Mageuzi), alisimama na kuomba Mwongozo wa Spika akitumia Kanuni ya 64 (1g) inayozuia wabunge kutumia lugha zisizofaa.

Kwa mujibu wa Machali, kauli ya Nkamia ilionyesha kuwa, mbwa ni wabunge wanaosikiliza mjadala na mwenye mbwa ni Naibu Spika ambaye wakati huo, alikuwa akiliongoza Bunge.

Kutokana na hali hiyo, alisema kuna haja mbunge mwenzake huyo kufuta kauli yake, kwa kuwa ilikuwa inakiuka Kanuni za Bunge.NKAMIA AENDELEA KUCHANGIA 
Mbunge wa jimbo la kondoa kusini. Juma Nkamia
Hata hivyo, Nkamia alisema hawezi kukubaliana na alichosema Machali kwa kuwa alichokisema hakikuwa matusi bali tafsiri ilivyofanywa na Machali haikuwa sahihi.

“Siwezi kukubaliana na kauli ya mdogo wangu Machali, nilichokisema siyo tusi, bali ni kutojua namna ya kutafsiri maneno. Kama hoja hiyo ingekuwa imetolewa na mtu makini, ningemuelewa, lakini kwa kuwa ni Machali, siwezi kuichukua,” alisema Nkamia na kuendelea kuchangia.

WENJE AINGILIA KATI
Lusinde alipokuwa akiendelea, Wenje alisimama na kuomba ampe taarifa mbunge mwenzake huyo na alipopewa nafasi, alisema fedha walizopewa na wafadhili hivi karibuni, zilikuwa ni kwa ajili ya kuimarisha chama wala siyo kwa ajili ya matumizi mabaya kama ilivyoelezwa na Lusinde.

LUSINDE AENDELEA.
Wenje alipomaliza kutoa taarifa yake, Lusinde alisimama tena na kusema katika mazungumzo yake hajaitaja Chadema, bali alisema kuna chama kimoja cha siasa.

“Siwezi kuikubali taarifa hiyo na nadhani huyu mtu bado amechanganyikiwa na uchaguzi wa Kenya, mimi sijaitaja Chadema bali nimesema kuna chama kimoja cha siasa na CCM pia ni chama cha siasa, sijui yeye anawashwa nini,” alisema Lusinde.

Pamoja na hayo, Lusinde alisema anawashangaa baadhi ya wabunge wanaochochea vurugu nchini na kusema kuwa vurugu zikitokea hakuna atakayesalimika.

“Kuna watu hapa wanachochea vurugu na sijui zikitokea wao watajificha wapi, mimi mtoto wangu wa mwisho ana miaka minane na mtoto wa Dk. Slaa sijui ana wiki ngapi.

“Nawashangaa wabunge wengine wanasema eti walemavu wanapewa mimba zisizotarajiwa, wakati hata hapa bungeni kuna wabunge wana mimba zisizotarajiwa na ipo siku tutawataja,” alisema. 

MAGDALENA SAKAYA.

Kauli hiyo, ilionekana kumkera Mbunge wa Viti Maalum, Magdalena Sakaya (CUF), ambaye aliomba mwongozo wa Spika akitaka Lusinde alieleze Bunge ni mbunge gani amepata mimba bila kutarajia.

Kwa mujibu wa Sakaya, kauli ya Lusinde ilionekana kuwakashfu wabunge ambao licha ya umri wao mkubwa inaonekana wapo wanaobeba mimba zisizotarajiwa, jambo ambalo alisema ni kuwadhalilisha.

NAIBU SPIKA AFAFANUA
Akizungumzia kauli zisizofaa, Naibu Spika aliwataka wabunge wawe makini na kauli zao kwani Bunge linaendeshwa kwa mujibu wa Kanuni.

Pamoja na hayo, alisema Sakaya ambaye alikuwa ameomba mwongozo juu ya wabunge kupata mimba zisizotarajiwa, alifuta mwongozo huo kutokana na sababu anazozijua yeye.

NKAMIA AOMBA MSAMAHA
Kutokana na uzito wa maneno yaliyokuwa yametolewa na Nkamia, Spika wa Bunge alipokuwa akijiandaa kuahirisha Bunge hadi jana jioni, alimtaka Nkamia azungumzie kauli ya kutotaka kuzungumza na mbwa.

Alipokuwa akitoa ufafanuzi, Nkamia alimwomba radhi Sugu na kusema kuwa aliyasema maneno hayo kwa sababu alikerwa na kauli iliyotolewa na mbunge huyo.

“Kilichonifanya niyaseme hayo ni kutokana na kauli ya rafiki yangu kipenzi Sugu kuingilia mchango wangu. Mimi ni ‘human being’ nina ‘character’ zote tatu, hivyo aliponiingilia, zikani ‘drive’ na kusema niliyosema.

“Sugu ni rafiki yangu na nyimbo zake ninazo, namuomba radhi na nitaendelea kusikiliza nyimbo zake,” alisema Nkamia.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari