HIVI NDIVYO WAKAZI WA KIJIJI CHA MBANGAYAO WALIVYOISHI KATIKA MAPANGO ISAKA WILAYA YA ULANGA MOROGORO SEHEMU YA PILI.

WILLIAM KILIMALILA KULIA NA IBRAHIM KIMANGA NI MIONGONI MWA WAKAZI HAO WA MBANGAYAO AMBAO WAMEKUWA WAKIISHI KATIKA MAPANGO.

Sehemu ya kwanza tuliishi kwa kuona namna serikali ilivyoanza kubomoa shule na wananchi kuelekeza kitongoji cha Isaka, sasa tunaenda kuona namna walivyohama na nini kiliendelea Isaka.....

Arock Athmani  Usheri (74) akielezea namna walivyohamishwa kwao alieleza kuwa walihama kwa hiyari na hali hiyo waliofia serikali kutumia nguvu ambayo kwao ingewaletea madhara makubwa kwani wanafahamu namna serikali inavyotumia nguvu kubwa katika mambo kama hayo.

Usheri alisema kuwa wameishi katika mapango kwa wiki mbili huku wengine wakiishi katika mazingira hayo akiwemo, Hermani Koya, William Kilimalila na Ibrahim Kimanga wenyewe wakiishi katika panga la Mashineni na wengine mango ya Kipingo na Mnazi.

“Huku usafiri hakuna hata wa pikipiki wala baiskeli, mgonjwa akiumwa ni lazima abebwe katika machela”. Alisema Usheri.

William Kilimalila na Ibrahim Kimanga wenyewe waliongeza kwa kusema kuwa wao wanaendelea kulala katika pango hilo hadi leo na wamekuwa wakikumbana na adha mbalimbali kipindi cha usiku.

Ibrahim Kimanga.

Anaanza kwa kusema kuwa wamekosa nafasi ya kujenga vibanda vya muda kutokana na majukumu ya kilimo na kuhamishwa kwao kumekuwa kwa ghafla hali iliyopelekea wao na watu wengine kukosa muda wa kujenga vibanda vya kuishi kama wenzao na kuamua kuendelea kujisitiri katika pango hilo la mashineni kwa kulala mpaka hapo watapoona wamepata nafasi ya kujenga vibanda vya muda.

“Baada ya kuhama kijiji cha Mbangayao tulifikia hapa katika pango la Mbangayao zaidi ya kaya 30 katika pango hili lakini hapa tukakumbana na changamoto nyingi ikiwemo funza wanaoshambulia vidole vya miguu, utitiri, homa za mara kwa mara na baridi kali kwa sababu hili pango haliko kama nyumba iliyojengwa na binadamu na tulihama wakati wa mvua za masika”. Alisema Kimanga.

Sehemu ya matatizo ya wakazi wa Mbangayao waliohamia kitongoji cha Isaka ambavyo hakina kabisa miundombinu ya barabara na huduma za afya.

Kaimu Mwenyekiti wa kijiji cha Mbangayao.

Evaresti Munyi anafafanua hali halisi ya wananchi wake kuwa baada ya kuhama kutoka kijiji cha Mbangayao na kuhamia kitongoji cha Isaka huku akieleza kuwa mpaka sasa kuna wananchi 19 wao bado wanaendelea kuishi katika mapango makuu matatu huku wale waliojenga vibanda wakiishi maisha duni.

Alitaja mapango hayo kuwani ni yale ya Rock Athumani lenye watu wanne, Mnazi watu saba na Kipingo likiwa na watu nane na kufanya idadi yao kufikia 19 wakitoka katika kaya 177 huku serikali ikitoa maturubai 20 kwa kaya 20 kwa ajili ya kuezeka katika vibanda vya muda ili kujikinga na mvua na wakati kaya 157 zenyewe zikikosa maturubai hayo.

Munyi alisema wananchi hao wanaishi katika mazingira magumu kwa zaidi ya mwezi mmoja tangu kuhamia Isaka na hilo linatokana na baadhi yao kushindwa kujenga vibanda vya muda vya kuishi kama walivyofanya wenzao kutokana na sababu mbalimbali.

“Mpaka sasa bado kuna wananchi 19 wa kijiji cha Mbangayao wanaendelea kuishi katika mapango kitongoji cha Isaka kwa zaidi ya mwezi mmoja na siku zake na hii inatokana na serikali kuwahamisha katika kijiji chao kwa sababu ya kupisha hifadhi ya msitu wa Mzelezi na hali hiyo imesababisha kuibu kero mbalimbali katika jamii hiyo”. Alisema Munyi.

  

Kuhamishwa huko kulikofanywa na serikali ya wilaya ya Ulanga kwanza hakukuwa na maandalizi kwa wananchi watakofikia lakini pia hakukuzingatia hali ya mahitaji muhimu ya kila siku ya binadamu na badala yake katika kitongoji cha Isaka kimekuwa na ukosefu wa huduma za kijamii ikiwemo kukosa kabisa huduma ya afya, majisafi na salama na kutokuwepo kabisa miundombinu ya barabara. Alisema Munyi.

Kutokana na hali hiyo wananchi hao wamekuwa wakikumbwa na maradhi ya kila aina katika maisha yao na kulazimika kutembea umbali mrefu kufuata mahitaji ya chakula katika kijiji walichohama, kutembea na wagonjwa katika machela ya miti kwa umbali ule ule iwe asubuhi, mchana, jioni ama usiku ilimradi tu kuifikia barabara ili kusubiri usafiri wa gari na kumpeleka hospitali ya wilaya ya Mahenge.

Katika kile kijiji cha Mbangayao kilikuwa na kila aina ya huduma za kijamii kwa mfano mgonjwa akiumwa alikuwa akisafirishwa muda wowote iwe kwa pikipiki ama gari lakini maisha ya Isaka yamekuwa tofauti kwani hakuna hata barabara na hii imekuwa kero kubwa sana kwa kila mwananchi, sasa je katika makazi ya watu tena zenye kaya 177 hakuna barabara, maduka kwa ajili ya mahitaji muhimu na majengo ya shule yamekuwa sio ya kuridhisha. Alisema Kaimu Mwenyekiti huyo.

Aliongeza kuwa maisha ya wana Mbangayao ndani ya kitongoji cha Isaka tangu kuhamia huko hayana tofauti kabisa na maisha ya wakimbizi wengine duniani pengine wao wanaweza kuishi maisha bora kuliko wao, kwani wakimbizi wamekuwa wakifaidika na misaada mbalimbali lakini kwao hakuna cha msaada wa namna yoyote kutoka kona yoyote ile ya pembe ya dunia hii inayotambua tabu ya maisha yao.

 

MWAJUMA KOYA KULIA NA ANNA KIALULE WAKICHOTA MAJI MTONI KITONGOJI CHA ISAKA ULANGA.

 

Kutokona na Hali hiyo kujitokeza kwa wananchi wa Mbangayao.

kwa kuishi kwenye mapango takribani wiki mbili mfululizo wakiwa wamerundikana kwa kulala katika mapango hayo kwa kuchanganyika wanawake, watoto na wanaume, ilipelekea baraza la madiwani wa halmashauri ya wilaya ya Ulanga kuunda kamati ndogo ya madiwani wakiwemo wataalamu toka idara ya elimu, afya na mazingira kwenda katika kitongoji hicho cha Isaka ili kujionea hali halisi.

Kuundwa kwa kamati ndogo ya madiwani iliundwa baada ya Diwani wa kata ya Isongo tarafa ya Vigoi, Henry Prosper Barua kuwasilisha hoja binafsi katika kikao cha baraza la madiwani wa halmashauri ya wilaya ya Ulanga kwa kusema kuwa wananchi wa Mbangayao walioamishwa na kwenda kitongoji cha Isaka kuwa wanaishi katika mazingira magumu baada ya kuhamia kitongoji hicho na kutoandaliwa miundombinu mbalimbali.

Barua aliyezungumza na mwandishi wa makala haya siku za mwanzo wa kujitokeza kwa tukio hilo alimweleza mwandishi wetu kuwa katika kikao hicho cha baraza la madiwani kilichofanyika 29 januari mwaka huu aliwatembelea wananchi wake akiwa amebeba madawa na  majisalama kufuatia kupata taarifa za maisha wanayoishi wananchi wake na kuona wakikosa huduma muhimu za msingi zikiwemo nyumba bora za kuishi, miundombinu ya barabara, maji, zahanati na shule huku wakiishi katika mapango.

Baada ya Diwani huyo kuona hali hiyo alifanya vikao katika maeneo yao ya mapango na wanafamilia zaidi ya watu 30 kwa kila pango hivyo kuliomba baraza kuunda kamati ndogo ili kuweza kujionea hali ya maisha kufuatua kuhamishwa kwao kwenda kitongoji cha Isaka.

Barua alifanunua kuwa zoezi la kuwaondoa wananchi hao katika kijiji cha Mbangayao lilifanyika kwa vitisho na wananchi hao walipatwa na uoga kwa kuhofia serikali kutumia nguvu hivyo sehemu kubwa ya watu walibomoa nyumba zao huku nyingine zikidaiwa kubomolewa na serikali.

Kwa mujibu wa miktasali mbalimbali kijiji hicho cha Mbangayao wananchi wao wanaishi kihalali kwani eneo hilo kutokana na kijiji kutambulika na serikali kwa kusajiliwa toka mwaka 1954 baada ya gavana aliyetambulika kwa jina la Robert De Stapeldon kugundua eneo hilo kuwa ni msitu wa hifadhi na kuchukua ekari 1904 za msitu wa hifadhi na kuacha vitongoji vya Lupanga na Mbangayao.

Itaendelea kesho kuona namna maisha yanavyoendelea.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari