AZAM FC YAIKABIDHI KOMBE LA UBINGWA WA LIGI KUU YA VODACOM YANGA SPORT CLUB MSIMU WA MWAKA 2012/2013 TANGA.

Kwa ufupi

Kwa matokeo hayo, Azam sasa imejihakikishia kucheza Kombe la Shirikisho mwakani baada ya kufikisha pointi 48, ambazo haziwezi kufikiwa na timu nyingine.http://www.mwananchi.co.tzMchezaji wa Coastal Union akikabiliana na miamba ya Azam FC.

 

TANGA. 
KLABU ya Azam FC imeikabidhi rasmi ubingwa Yanga baada ya kulazimishwa sare 1-1 na Coastal Union jana kwenye Uwanja wa Mkwakwani, Tanga.

Nahodha Aggrey Morris akicheza mechi yake ya kwanza tangu Takukuru ilipomsafisha katika kashfa ya kupokea rushwa, aliifungia Azam bao la kuongoza kwa mkwaju wa penalti katika dakika ya 59, lakini Danny Lyanga aliyeingia akitokea benchi aliwasawazishia wenyeji katika dakika ya 72.

Kwa matokeo hayo, Azam sasa imejihakikishia kucheza Kombe la Shirikisho mwakani baada ya kufikisha pointi 48, ambazo haziwezi kufikiwa na timu nyingine, huku wakitoa nafasi kwa Yanga kutwaa ubingwa wake wa 23 wa Ligi Kuu msimu huu wakiwa na pointi zake 56 ambazo hazitaweza kufikiwa na timu yoyote.

Katika mchezo huo, Kocha wa Azam, Stewart Hall aliwaanzisha kwa mara ya kwanza, nahodha Morris na Erasto Nyoni waliomaliza vifungo vyao, huku akiwa wamewapumzisha nyota wake kadhaa wa kikosi cha kwanza.

“Tuliwapumzisha wachezaji wetu kadhaa ili kujiandaa na mechi yetu ya Morocco kwa sababu ni ngumu na iliyojaa ushindani. 

Kwa jumla timu yangu ilicheza vizuri na nimevutiwa na jinsi Nyoni alivyocheza kwa kiwango cha juu,” alisema Hall.

“Tusingeweza kuizuia Yanga kutwaa ubingwa, kwa sababu ni timu bora inayofundishwa na kocha bora, kwa namna yoyote katika mechi tatu zilizobaki wasingekosa pointi moja.”

Wenyeji Coastal Union walianza vizuri na kufanikiwa kufika katika goli kwa Azam katika dakika kwanza, lakini shuti la Abdi Banda lilidakwa kwa ustadi mkubwa na kipa Mwadin Ally.

Azam walijibu mapigo dakika ya 13, baada ya shuti la Erasto Nyoni kupaa juu baada ya kazi nzuri ya Mwaipopo.

Mashabiki wa Coastal Union waliokuwa wamekaa jukwaa la Old Tanga walijitahidi kushangilia kwa nguvu timu yao wakati wa mapumziko walimfuta mwamuzi wakitaka kumpiga kwa madai kuwa anapendelea Azam, lakini Polisi waliingilia kati.

Katika dakika ya 56, mshambuliaji Gaudence Mwaikimba alichezewa vibaya na Razack Khalfan kwenye eneo la penalti na mwamuzi Andrew Shamba wa Pwani kutoa penalti iliyofungwa na nahodha Morris.

Mshambuliaji Danny Lyanga aliyeingia akitokea benchi kuchukua nafasi ya Selemani Selembe aliisawazishia Coastal Union katika dakika ya 72.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari