MAHAKAMA YA WILAYA CHA CHATO YATOA YAAMURU KUKAMATWA KWA ALIYEKUWA MKUU WA WILAYA HIYO, HADIJA NYEMBO KWA TUHUMA ZA UBADHILIFU WA PEMBEJEO ZA KILIMO.

Hadija Nyembo.

MAHAKAMA ya Wilaya ya Chato mkoani Geita imeamuru kukamatwa kwa aliyekuwa Mkuu wa wilaya hiyo, Hadija Nyembo na aliyekuwa Mkurugenzi wa Halmashauri ya wilaya hiyo, Hamida Kwikwega, kuunganishw
a kwenye kesi ya ubadhilifu wa pembejeo za kilimo.
Hatua hiyo imekuja baada ya Taasisi ya Kupambana na Kuzuia Rushwa(Takukuru) wilayani hapa, kuiomba mahakama hiyo kutoa hati maalumu ya kuwakamata watuhumiwa hao ili wafikishwe mahakamani kujibu tuhuma zinazowakabili.
Mwingine anayetakiwa kukamatwa ni aliyekuwa Ofisa kilimo na Mifugo wa wilaya hiyo, Dk. Phares Tongola.
Takukuru imewafikisha watuhumiwa wengine ambao ni namba 4 na 5 katika kesi hiyo na nyadhifa zao kwenye mabano, Mery David, (Wakala wa Usambazaji wa pembejeo za kilimo kata ya Buseresere), na Mageni Mbassa (Kaimu mtendaji wa kijiji cha Mapinduzi) wilayani hapa.
Watuhumiwa hao wanakabiliwa na mashitaka 63 yenye makosa matano,  yakiwamo ya kutumia nyaraka kwa lengo la kumdanganya mwajiri, kutumia madaraka vibaya, ubadhilifu wa fedha za umma, kusaidia kutenda kosa na kughushi nyaraka.
Hakimu wa Mahakama ya wilaya ya Chato, Jovith Katto, aliamuru washitakiwa hao kwenda mahabusu baada ya kushindwa kutimiza masharti ya dhamana.
Wakati mashtaka hayo yakisomwa mahakamani, mshitakiwa namba moja aliyekuwa Mkuu wa Wilaya ya Chato (Nyembo), ambaye kwa sasa ni Mkuu wa Wilaya ya Uvinza mkoani Kigoma, namba mbili aliyekuwa Mkurugenzi wa halmashauri hiyo (Kwikwega), na namba tatu, Ofisa kilimo wa wilaya hiyo Dk, Tongola, hawakuwapo mahakamani.
Mwendesha mashitaka wa Takukuru, Kelvin Murusuri, alisema watuhumiwa hao walitenda makosa hayo kati ya Oktoba 10, 2010 hadi Januari mosi, 2011, ambapo kwa pamoja walisababisha hasara ya mamilioni ya fedha za serikali.
Murusuri aliiomba mahakama hiyo kutoa hati maalumu ya kuwakamatwa watuhumiwa wengine ambao hawakuwapo mahakamani ambao ni namba moja hadi tatu ili waunganishwe na wenzao, ombi lililokubaliwa na mahakama hiyo.
Hakimu Katto alisema mahakama hiyo imekubali kutoa hati ya kuwakamata watuhumiwa wengine na kwamba kesi hiyo itatajwa tena Oktoba 25, mwaka huu. CHANZO: NIPASHE

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari