MAFURIKO YAUA WANAFUNZI WAWILI WA SHULE ZA MSINGI BAADA YA KUWASOMBA KATIKA MFEREJI MJI WA IFAKARA MOROGORO.

Picha ya maktaba/ MTANDA BLOG

Juma Mtanda, Morogoro

Morogoro: Watoto wawili wa shule za msingi Ifakara na Mbasa wilaya ya Kilombro, Mkoani Morogoro wamefariki dunia baada ya kusombwa na maji ya mafuriko wakati wakiogelea katika mfereji unaopokea maji kutoka mto Lumemo baada ya mvua kubwa kunyesha.

Akizungumza na mwandishi wa gazeti hili katika mji wa Ifakara, Afisa Mtendaji wa kata ya Viwanja Sitini, Gregory Midas alisema kuwa watoto hao wamefariki dunia April15 mwaka huu majira ya saa 3 asubuhi wakati wakiogelea katika mfereji huo.

 Aliwataja wanafunzi hao kuwa ni, Ester Kong’oa (13) anayesoma darasa la sita katika shule ya msingi Ifakara na, Rehema Lyakalyaka (12) darasa la nne katika shule ya msingi Mbasa .

 Midas alisema kuwa wanafunzi hao walisombwa na maji ya mfereji unaopokea maji kutoka kwenye mto Lumemo unaoingiza maji katika mto Kilombero.

Midas anasema mafuriko hayo yamesababisha shule nne kufungwa ikiwemo shule ya Sekondari Kwashungu na tatu za msingi Ifakara, Lumemo na Mautanga.

“Hawa watoto wamekumbwa na tukio hili baada ya kutoka shule na kwenda kuogelea kwenye mfereji unaopokea maji kutoka mto Lumemo ambao uliofurika maji baada ya mvua kubwa kunyesha na kusababisha maji kusambaa sehemu mbalimbal za mji wa ifakara,”alisema Mtendaji huyo.

Midas amewataka wazazi wanaoishi katika eneo hilo kuwa makini na watoto wao katika kipindi chote hasa kipindi hiki cha masika.

Akiongea na gazeti hili, Kamanda wa jeshi la Polisi mkoa wa Morogoro, Ulrich Matei amedhibitisha kutokea kwa tukio hilo la vifo hivyo.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari