MWENYEKITI wa Chama cha NCCR-Mageuzi, James Mbatia amepewa siku tatu na mwanachama wa chama hicho akitakiwa kujiuzulu mwenyewe wadhifa huo ndani ya chama kwa madai ya kupora mali za chama na kujimilikisha.
Mwanachama huyo, Faustin Sungura ametoa muda huo jana, Dar es Salaam alipozungumza na waandishi wa habari. Alisema kuwa hata Katibu Mkuu wa Chama hicho, Martin Danda anatakiwa kujiuzulu kutokana na kutamka asichokijua kuhusu mali za chama hicho.
Kuhusu Mbatia, Sungura amesema Mbatia kama hatachukua maamuzi hayo kwa muda uliotajwa, atakwenda Mahakama ya Wilaya kuomba kibali cha kesi ya jinai na akikipata atamshitaki Mbatia kwa wizi wa mali za chama.
Amesema mali anazomtuhumu nazo Mbatia kuwa ni za chama ni pamoja na shamba la ekari 56 lililopo eneo la Kilomo wilayani Bagamoyo, mkoa wa Pwani na nyumba mbili zilizopo eneo la Bunju B jijini Dar es Salaam.
Kuhusu shamba hilo, alisema lilinunuliwa mwaka 2002 kwa makubaliano ya wanachama waasisi wa chama hicho kuwa litumike kama chuo cha kufundishia makada wa chama hicho ambapo kilitakiwa kuanza kazi Desemba mwaka huo huo.
“Ununuzi wa shamba hilo ni moja ya mpango mkakati wa chama hicho, ambao ulielekeza kuwepo kwa ujenzi huo lakini baadae Mwenyekiti wa chama hicho akawageuka na kudai kuwa shamba hilo ni mali yake, vielelezo vya ushahidi vipo hata katika taarifa zake kwa vyombo vya habari alizungumzia kuhusu suala hilo,” amesema Sungura.
Sungura amesema kuhusu tuhuma hizo kwa kiongozi wake, kuwa Mbatia ni shahidi namba moja kwa kuwa taarifa za ununuzi wa shamba hilo upo katika taarifa zilizoandikwa katika magazeti nchini kwa mwaka 2002 zikimnukuu mwenyekiti huyo.
Alisema “Katika gazeti moja nchini la mwaka 2002, Februari 16, Mbatia mwenyewe akizungumza na waandishi wa habari alibainisha kuwepo kwa haja ya ununuzi wa shamba hilo kwa matumizi ya kuwa chuo, lakini kwa sasa amekuwa akisema shamba hilo ni la kwake na sio la chama.”
Sungura alisema nyaraka za vilelezo vya kuhusu ununuzi wa shamba hilo pamoja na nyumba vipo na wenye kujua taarifa za mali hizo za chama ni wanachama waliobaki katika chama hicho ambao ni waasisi, walioingia wapya hawajui na kudai wamekuwa wakitumiwa na kiongozi huyo kupotosha ukweli.
Kuhusu taarifa hizo kama ni msimamo wa chama, Sungura alisema si msimamo wa chama na kwamba hata inapotokea wanachama wakawa hawana imani na kiongozi wao, katiba ya chama ina utaratibu wa vikao kwa ajili ya suala husika.HABARILEO
0 comments:
Post a Comment