DKT MAGUFULI AILIPUA OFISI YA WAZIRI MKUU

WAZIRI wa Ujenzi, John Magufuli, ameiumbua Ofisi ya Waziri Mkuu na Wizara ya Sayansi na Teknolojia kuwa inaongoza kwa kutumia magari ya Serikali yasiyosajiliwa. Dk. Magufuli, alisema hayo jana alipokuwa akizindua Bodi ya Wakala wa Barabara Tanzania (TANROADS) na Bodi ya Mfuko wa Barabara.

Alisema juhudi kubwa zinafanyika kuhakikisha magari yote ya Serikali, yasiyosajiliwa yanatumia namba za kiraia, yanasajiliwa kwa namba za Serikali.

“Hadi sasa magari 974, yaliyokuwa na namba za kiraia yamesajiliwa kwa namba za Serikali, yako magari mengine 746 ya Serikali hayajasajiliwa.

“Kuna wizara mbili zinaongoza kuwa na magari ambayo hayajasajiliwa, Ofisi ya Waziri Mkuu, Tawala za Mikoa na Serikali za Mitaa (TAMISEMI) na Wizara ya Sayansi na Teknolojia,” alisema.

Alisema utaratibu wa kuhakiki magari yasiyosajiliwa, unaendelea ili kuhakikisha magari yote, yanasajiliwa na yanatumia namba za Serikali.

Alisema makusanyo ya Mfuko wa Barabara yameongezeka kutoka Sh bilioni 47.252 mwaka 2000/01 na kufikia Sh bilioni 406.77 mwaka 2011/12, ikiwa ni ongezeko la asilimia 760.

Alisema mwaka 2012/13, lengo ni kukusanya Sh bilioni 429.664 kwa ajili ya matengenezo ya barabara nchini, ambapo fedha hizo, zitakidhi asilimia 70 ya mahitaji ya matengenezo hayo.

“Utafiti umefanyika katika halmashauri, asilimia 40 hazina wahandisi waliosajiliwa, nawaambia Bodi ya Mfuko wa Barabara, kuweni wakali kwa zile halmashauri zote ambazo hazina wahandisi waliosajiliwa, msiwapelekee fedha.

“Wanatakiwa kuajiri wahandisi waliosajiliwa, badala ya kuendelea kuwatumia mafundi mchundo, hawataki kuajiri, wakinyimwa fedha watajifunza,” alisema.

Akizungumzia wahandisi wa TANROADS, Dk. Magufuli aliwataka kufanya kazi kwa kubuni mikakati, badala ya kupata vigugumizi wanapofikiria kuanza kutengeneza flay over.

“Msiwe wanasiasa, mfanye yale yanayowezekana, barabara ya Morocco kwenda Mwenge kuna nyumba zimewekewa alama ya X, kwa ajili ya kubomolewa kupisha upanuzi wa barabara.

“Nyumba zile zimebomolewa, wanaostahili kulipwa fidia walipwe fedha zimetengwa na wale wasiostahili watupishe ujenzi wa barabara ya njia nne uanze.

“Habari za tuko katika mchakato zimechokwa, mchakato ubaki kwa wana siasa nyie mbaki kuwa watendaji zaidi,” alisema Dk. Magufuli.

“Bodi zote mnatakiwa kuwa wakali, msiwahurumie watu waliochini yenu ili thamani ya fedha ya Watanzania ionekane ikitumika ipasavyo katika barabara zetu,” alisema.

Baada ya kusema hayo, Dk. Magufuli alizindua bodi mpya ya TANROADS ambapo mwenyekiti wake ni Hawa Mmanga, wajumbe, Joseph Nyamhanga, Bakel Sahel, Richard Rugimbana, Haron Kisaka, Eligius Mwankenja na Elina Kayanda.

Bodi ya Mfuko wa Barabara, itaongozwa na Mwenyekiti James Wanyancha, wajumbe, Helbert Musilango, Ramadhani Kija, Jumanne Sigiri, Joseph Nyamhanga, Wilbis Mbogoro, Renatus Bube na Peter Chisamilo.

Akizungumza Wanyancha alisema, watahakikisha wanasimamia fedha za mfuko kwa umakini na kukagua vitabu vya mahesabu na kazi za ujenzi wa barabara kama zinafanyika ilivyokusudiwa.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari