RAIS OBAMA: MATUKIO YA UFYATUAJI RISASI LAZIMA YAKOMESHWE.

 

RAIS OBAMA.

MMOJA WA WAZAZI WALIOPOTEZA WATOTO KWA KUPIGWA NA RISASI AKIANGUA KILIO KATIKA TUKIO HILO.

RAIS wa Marekani Barack Obama anaahidi kutumia uwezo wake wote kuzuia maafa kama yaliyotokea Ijumaa ya mauaji ya wanafunzi 20 na watu wazima sita kwenye shule moja ya msingi katika mji wa Newtown, huku  wakazi wa eneo hilo wanajiandaa kwa mazishi ya kwanza kufanyika ya waathirika wa tukio hilo.

Mazishi ya watoto wawili ambao walikufa katika ufyatuaji holela wa risasi katika mji wa kaskazini mashariki wa Newtown, Connecticut yanafanyika Jumatatu huku shule katika wilaya hiyo zikiwa bado zimefungwa.

Rais Obama aliungana na waombolezaji mjini  Newtown Jumapili usiku akiuambia mkusanyiko wa maafa hayo kwamba hawako peke yao katika majonzi haya na kwamba taifa limeachwa na maswali magumu.

Alielezea kwamba hii ilikuwa mara ya nne katika tukio la ufyatuaji risasi holela lililohusisha umati wa watu ambalo limetokea tangu alipoingia madarakani takribani miaka minne iliyopita.

“Hatuwezi kuvumilia jambo kama hili tena. Maafa haya lazima yakomeshwe na kukomesha hili lazima tufanye mabadiliko. 

Tutaambiwa kuwa chanzo cha ghasia aina hii hazielezeki kwa urahisi  na hilo ni kweli. 

Hakuna sheria, hakuna sheria inayoweza   kutokomeza  majanga duniani na kuzuia kila hatua ya ghasia kutokea katika jamii yetu. Lakini hilo haliwezi kuwa kisingizo cha  kutokuchukua hatua”.

Awali Rais alikutana kwa faragha na familia za watu waliopoteza wapendwa wao katika tukio lililotokea kwenye shule ya msingi ya Sandy Hook na kuwashukuru waokozi  waliojitokeza kutoa msaada katika maafa hayo. 

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari