WASAFIRI WAANZA KUPANDISHA BEI YA NAULI KIHOLELA.

Kwa ufupi:

Wakizungumza na Mwananchi jana, abiria hao walisema kumekuwa na tatizo la kutotabirika kwa nauli za baadhi ya mabasi na hasa katika kipindi hiki cha sikukuu za mwishoni mwa mwaka.

BAADHI ya abiria wa mabasi wanaosafiri kwenda katika mikoa mbalimbali wakitokea mkoani Mbeya, wameiomba Mamlaka ya Udhibiti wa Usafiri wa Majini na Nchikavu (Sumatra), kuwashinikiza wamiliki wa mabasi, kubandika kwenye mbao za matangazo, orodha za nauli halali za safari, ili kudhibiti mchezo mchafu wa kuwabambikia watu nauli.

Vitendo hivyo, vimekuwa vikifanywa na wapigadebe wa mabasi mbalimbali katika kituo kikuu cha mabasi cha jijini Mbeya na hata katika miji mingine nchini.

Wakizungumza na Mwananchi jana, abiria hao walisema kumekuwa na tatizo la kutotabirika kwa nauli za baadhi ya mabasi na hasa katika kipindi hiki cha sikukuu za mwishoni mwa mwaka.

Walisema wapigadebe katika mabasi hayo, wamekuwa wakiwabambikia watu nauli wasizostahili kulipa, jambo ambalo ni la kuwaumiza.

Abiria hao walisema kwa msingi huo, kuna haja kwa Sumatra, kuwashinikiza wamiliki wa mabasi kuhakikisha kuwa wanabandika kwenye mbao za matangazo katika ofisi zao, orodha za nauli halali.

“Hii itasaidia sana kuwafanya abiria kuachana na tatizo la wapigadebe kuwarubuni nauli,”alisema Johnson Abraham.

Abraham alisema ni jukumu la wamiliki wa mabasi ya safari ndefu, kudhibiti tatizo hilo linaloelekea kuota mizizi kila inapofika mwishoni mwa mwaka.

Abiria hao pia waliliomba Jeshi la Polisi, kuwaondoa wapigadebe katika kituo kikuu cha mabasi, kwa maelezo kuwa wamekuwa kero kubwa.

Walisema pamoja ma mambo mengine, watu hao wamekuwa wakitoa lugha chafu kwa abiria na hata kuwaibia mali zao..

“Wamiliki wa mabasi, wanapaswa kuwa na vijana wao wanaotambulika kisheria, ili kuondokana na adha ya abiria ya kusumbuliwa na wapigadeba. 


Hali hiyo imekuwa ikichangia hata kuibiwa mali zao zikiwemo simu za mkononi,” alisema abiria mwingine.

Kamanda wa Polisi mkoani Mbeya, Athuman Diwani, alisema amepokea malalamiko hayo na kwamba wamewasiliana na Sumatra, ili kuangalia namna ya kukabiliana na tatizo hilo.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari