HIKI NDICHO KINACHOWAPA YANGA PRESHA KATIKA MBIO ZA UBINGWA WA LIGI KUU TANZANIA BARA KUELEKEA MCHEZO WAKE NA AZAM FC.

Kiungo wa Azam, Hamis Mcha (kulia) akijaribu kumpiga chenga beki wa Coastal Union, Mbwana Hamisi katika mchezo wa Ligi Kuu Bara, kwenye Uwanja wa Azam Complex mwishoni mwa wiki. Azam ilishinda 4-0. Picha na Michael Matemanga. 

DAR ES SALAAM.

KOCHA Mkuu wa Yanga, Hans van der Pluijm amesema hatma ya ubingwa kwa timu yake itajulikana kesho wakati watakapowakabili vinara wa Ligi Kuu, Azam kwenye Uwanja wa Taifa, Dar es Salaam.

Yanga itaingia kwenye mchezo huo ikiwa  nyuma kwa tofauti ya pointi nne kwa Azam (43) na mchezo moja mkononi kulinganisha na vinara hao ambao hawajapoteza mchezo wowote hadi sasa.

Mdachi huyo aliliambia gazeti hili kuwa wachezaji wake wanapaswa kuuchukulia umuhimu mkubwa mchezo huo kwani ndiyo utakaotoa mwelekeo wao wa kutetea ubingwa wao msimu huu.

Pluijm alisema Azam ni timu ngumu na haijapoteza mchezo wowote tangu kuanza kwa msimu huu wa ligi hivyo kama wakishindwa kuwafunga basi wanaweza kujikuta katika hali mbaya zaidi.

“Maandalizi yetu yanakwenda vizuri. Nashukuru wachezaji wangu wako vizuri isipokuwa Mrisho Ngasa ambaye bado anaumwa, lakini wengine natumaini wataziba nafasi yake.

“Nauchukulia mchezo huo kwa umuhimu mkubwa, hatupaswi kupoteza mechi hii kwani matokeo yoyote mabaya tutakayopata yatatuweka katika mazingira mabaya. Ukiangalia Azam  ndiyo wapinzani wetu wakubwa sasa, hivyo hatuna budi kujitahidi na kuhakikisha tunawafunga.

Pia, Pluijm amewalalamikia washambuliaji wake kwa kukosa umakini wanapolifikia lango la wapinzani kwani ilichangia kukosa ushindi Jumamosi iliyopita dhidi ya Mtibwa Sugar.

Kocha huyo anaamini kama washambuliaji wake Emmanuel Okwi, Hamis Kiiza na Didier Kavumbagu wangekuwa makini basi wangeibuka na ushindi mnono.

“Tulicheza vizuri na tulistahili kushinda mchezo ule, lakini washambuliaji wangu walikosa magoli mengi kwa sababu hawatulii. Wanapolifikia lango, wanatakiwa kubadilika na kuona kuwa  tunausaka ubingwa  kwa hali yoyote.

“Muda umeisha na zimebaki mechi chache kabla ya msimu kumalizika. Wachezaji wote wanatakiwa  kutambua hilo na kutimiza ipasavyo majukumu yao uwanjani ili tuweza kutetea ubingwa wetu,” alisisitiza Pluijm.

Katika mchezo wa raundi ya kwanza, chipukizi Joseph Kamwaga alifunga bao katika dakika ya mwisho na kuipa Azam ushindi huo. MWANANCHI

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari