RAIS KIBAKI AMPA SHAVU JK.

HATIMAYE marais wa nchi wanachama wa Jumuiya ya Afrika Mashariki (EAC), wamezindua jengo la makao makuu ya umoja huo lililogharimu Euro milioni 14, ambazo ni zaidi ya Sh bilioni 28.

Jengo hilo limejengwa jirani na Kituo cha Mikutano cha Kimataifa cha Arusha (AICC), likiwa na majengo matano yanayowakilisha nchi wanachama.

Jumuiya ya Afrika Mashariki inayokadiriwa kuwa na watu zaidi ya milioni 127, inaundwa na nchi za Uganda, Kenya, Rwanda, Burundi na Tanzania.

Akizungumza jana katika uzinduzi huo Rais wa Kenya, Mwai Kibaki ambaye pia ndiye mwenyekiti wa jumuiya hiyo aliipongeza Serikali ya Tanzania kwa kutoa eneo la ujenzi.

Alisema juhudi zilizofanywa na Rais Jakaya Kikwete, zinapaswa kuigwa kwa viongozi wa Afrika Mashariki kutokana kuwa msukumo wa kuimarisha jumuiya hiyo kila nyanja.

Viongozi wengine waliohudhuria sherehe hizo ni Rais Kikwete, Rais Piere Nkurunzinza (Burundi), huku Rais Yoweri Museveni (Uganda) na Rais Paul Kagame (Rwanda) wao walituma wawakilishi.

“Ukarimu wa Rais Kikwete kutoa eneo hili pamoja na eneo jingine kule wilayani Arumeru Kisongo, ni wa kipekee katika Jumuiya yetu hii,” alisema Rais Kibaki.

Katika salamu zake hizo, Rais Kibaki pia alitumia fursa hiyo kuishukuru Serikali ya Ujerumani, kwa kutoa msaada usio na masharti kwa ajili ya ujenzi huo.

Rais Kibaki aliendelea kubainisha kwamba, kuwapo majengo hayo sasa kutafanya Jumuiya hiyo iendelee kuimarika katika shughuli zake za kila siku.

Awali Rais Kikwete aliwaeleza wabunge wa jumuiya hiyo kuwa, wanawajibu wa kutoa sauti zao kwa nchi wanachama, ili ziweze kuimarisha masuala ya miundombinu.

Rais Kikwete alitoa kauli hiyo wakati akifungua Bunge la jumuia hiyo, ambalo ukumbi wake umo ndani ya jengo hilo.

Alisema endapo miundombinu ikiimarishwa kwa nchi wanachama, ni wazi kuwa ufanyaji wa biashara mbalimbali utaongezeka na kupiga hatua za kiuchumi.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari