Dunia inaweza kufikia lengo la milenia la kutokomeza Ukimwi: Ban

 

KATIBU Mkuu wa Umoja wa Mataifa Ban Ki-Moon amezitaka nchi wanachama wa umoja huo kuongeza jitihada za kutokomeza maambukizi ya virusi vya Ukimwi kutoka kwa mama kwenda kwa mtoto huku zikihakikisha kuwa wanawake wazazi wenye virusi vya Ukimwi wanaishi na afya zao zinastawi.

Bwana Ban amesema hayo katika ujumbe wake wa kuadhimisha siku ya Ukimwi duniani hii leo ambapo ujumbe maalum ni kutokomeza kabisa maambukizi mapya ya ukimwi, unyanyapaa na vifo vitokanavyo na Ukimwi.

Amesema kuongeza juhudi za kupunguza maambukizi kutoka kwa mama kwenda kwa mtoto ni muhimu kwa kuwa asilimia 50 ya mafanikio ya kupunguza maambukizi mapya ya virusi vya Ukimwi kwa miaka miwili iliyopita yamepatikana miongoni mwa watoto wachanga.

Katibu Mkuu huyo wa Umoja wa Mataifa amesema lengo la milenia kuhusu Ukimwi liko bayana ambalo ni kutokomeza Ukimwi na kubadili mwelekeo wa maambukizi ifikapo mwaka 2015 na kupongeza kuwa kutokana na juhudi za serikali na taasisi za kiraia kuna mwelekeo wa kutimiza lengo hilo.

Amegusia unyanyapaa dhidi ya watu wanaoishi na virusi vya Ukimwi na kutaka serikali kuondoa hali hiyo ambayo inaongeza hatari zaidi kwa watu walioko hatarini kuambukizwa virusi vya ukimwi.

Ripoti ya mwaka huu ya Ukimwi iliyotolewa na shirika la Umoja wa Mataifa la kupambana na ukimwi, UNAIDS, inaonyesha kupungua kwa kiasi kikubwa kwa maambukizi mapya ya virusi vya Ukimwi hususan katika nchi za vipato vya kati na chini.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari