WAZIRI MKUU MSTAAFU AWAFUTA KAZI MAAFISA IDARA YA ARDHI WILAYA YA KISARAWE MKOANI PWANI.

WAZIRI Mkuu mstaafu, Fredrick Sumaye juzi aligeuka mbogo, baada ya kukubaliana kwa kauli moja na wakazi wa Kijiji cha Kiluvya A, kuwatimua maofisa wa Idara ya Ardhi wa Halmashauri ya Wilaya ya Kisarawe, ambao walikwenda kuwashawishi wananchi wakubali kugawa ardhi yao bila kuwashirikisha. Sumaye alikuwa mmoja wa wakazi wa kijiji hicho, waliohudhuria mkutano uliyofanyika ofisi za Serikali ya mtaa ya kijiji hicho.
Sumaye alikuja juu, baada ya Mtendaji wa Mamlaka ya Mji Mdogo wa Kisarawe, Constantine Mnemele kueleza sababu za ujio wao ndani ya kijiji hicho.

Alisema wamefika kijijini hapo, ili kuwaeleza wananchi namna ambavyo wanataka kugawa ardhi yao kwa ajili ya maendeleo ya mji wa Kisarawe.

Jambo kubwa ambalo lilionekana kumsikitisha Sumaye na wanakijiji wengine, ni pale Mnem
ele alipowaambia wanakijiji wawe tayari kutoa ardhi yao kwa zaidi ya asilimia 40.

Kauli hiyo, ilionekana wazi kuibua hasira za wanakijiji hao, ambao kwa kauli moja waliwataka watendaji hao waondoke mara moja katika mkutano huo.

Mnemele, alisema asilimia 15 ya eneo litakalochukuliwa ni kwa ajili ya uhamasishaji na michoro na asilimia tano ni miundombinu ya barabara na fidia asilimia 12 zitarudi halmashauri, huku asilimia nane itakwenda kwa wazabuni.

SUMAYE NA KAULI
Baada ya maelezo hayo, Sumaye ambaye ni mkazi wa Kiluvya A, aliomba kupewa nafasi ya kuzungumza.

Alianza kwa kuwarushia makombora watendaji hao kuwataka waondoke katika mkutano huo ili wakajipange upya na kusema huo ni ujanja wa kutaka kuwapora ardhi wanakijiji.

Alisema hakuna mtu anayekataa maendeleo katika kijiji chao, lakini ujanja wanaotumia halmashauri hiyo, ni jambo ambalo haliwezekani kwa sababu kufanya hivyo ni sawa na kuwadhulumu.

“Nilichokuwa nategemea kukiona hapa, ni ninyi watendaji mngekuja na ramani ili mtuonyeshe wanakijiji na kutuomba jinsi ya kushiriki taratibu zote za mipango miji, tunashangaa kuona kila kitu mmejipangia wenyewe bila kutushirikisha, jambo hilo ni gumu kwetu.

“Nimeishi katika kijiji hiki miaka mingi, tena wakati huo kulikuwa pori kubwa hata barabara hazikuwepo zaidi ya kung’atwa na mbung’o, eti leo mnakuja mnataka asilimia 40 za wanakijiji zinatoka wapi? Alihoji Sumaye.

Baada ya maelezo hayo, Sumaye na wanakijiji wenzake kwa kauli moja waliunga mkono na kuvunja mkutano huo, ili kutoa fursa kwa watendaji wa halmashauri hiyo warudi wajipange upya.

Naye Ofisa Ardhi wa Wilaya ya Kisarawe, Alkard Machum aliwaambia wanakijiji hao kuwa pendekezo la asilimia 40, lilikuja baada ya mkurugenzi wa halmashauri hiyo kukosa fedha za kuwalipa fidia wananchi. CHANZO MTANZANIA.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari