NI AIBU KWA SERIKALI KUDAIWA NA WAKULIMA

Mkazi wa Kichangani, Yuster Manasa (40) akipalilia mahindi huku akiwa na mtoto mgongoni katika shamba lake lililopo kata ya Kinglwira Manispaa ya Morogoro. PICHA MAKTABA MTANDA BLOG

RAIS Jakaya Kikwete amesema ni aibu kwa Serikali kudaiwa na wakulima na amewahakikishia wakulima wa Wilaya ya Ludewa Mkoa wa Njombe, kuwa watalip

wa haraka iwezekanavyo fedha zao wanazodai kwa kuiuzia Serikali mahindi yao.

Aidha, Rais Kikwete amethibitisha kuwa meli ambazo Serikali yake iliahidi kununua kwa ajili ya usafiri katika Maziwa Makuu ya Tanzania, zinajengwa na zitazinduliwa kabla ya mwaka 2015.

Amesema zinaweza kuwa meli mbili, badala ya moja, kwa kila moja ya maziwa ya Nyasa, Tanganyika na Victoria. Rais alisema hayo juzi, alipozungumza kwa nyakati tofauti katika Wilaya ya Ludewa, ikiwa ni mwendelezo wa ziara yake ya kikazi kukagua na kuzindua miradi ya maendeleo katika Mkoa wa Njombe.

Rais Kikwete aliwaambia wakazi hao wa Ludewa kwenye mkutano wa hadhara kuwa ni kweli Serikali yake inadaiwa kiasi cha Sh bilioni 17 ikiwa ni deni la wakulima wa mikoa mbali mbali nchini, ambao waliuza mahindi yao ya msimu uliopita kwa Wakala wa Taifa wa Hifadhi ya Chakula (NFRA).

Suala hilo lilijirudia tena wakati Rais Kikwete alipokuwa anapokea Ripoti ya Maendeleo ya Wilaya ya Ludewa, ambako aliambiwa kuwa wakulima wa wilaya hiyo pekee, walikuwa bado wanaidai Serikali Sh bilioni 3.115 ambayo ni thamani ya mahindi ya tani 6,231, ambayo wakulima hao waliiuzia NFRA.

Aliambiwa kuwa mpaka sasa wakulima wa Wilaya ya Ludewa, wamelipwa Sh bilioni 2.839 kutokana na tani 5,679 za mahindi.

NFRA ilikuwa imelenga kununua kutoka kwa wakulima wa Wilaya ya Ludewa tani 13,000, lakini mpaka sasa imeweza kununua tani 11,911 tu, na sehemu kubwa ya kiasi hicho, haijalipiwa na Serikali. “Hii ni aibu. Serikali haiwezi kudaiwa na wakulima. Hizi fedha zitalipwa tu,” alisema Rais Kikwete.

Alielezea hatua ambazo amezichukua binafsi katika siku mbili kuhakikisha wakulima wanalipwa fedha zao. Pia, alisema Serikali yake itaangalia uwezekano wa kununua tani 2,972 za mahindi ya msimu uliopita, zilizobakia mikononi mwa wakulima wa wilaya hiyo.

“Naambiwa kuwa bado NFRA inahitaji kiasi cha tani 40,000 hivi ili kukamilisha shehena ya idadi ya kiasi cha tani 250,000 za mahindi kwa ajili ya Hifadhi ya Taifa mwaka huu. Nitawaambia waangalie kama wanaweza kununua kiasi hiki kilichobakia mikononi mwa wakulima wa Ludewa”, alisema.

Kuhusu maombi ya wananchi wa Ludewa kununua meli ya kuchukua nafasi ya Mv. Mbeya iliyozama katika Ziwa Nyasa ili kurahisisha usafiri ndani ya ziwa hilo, ambalo linapakana na Wilaya ya Ludewa, Rais alisema Serikali yake inanunua meli hiyo.

“Tunajua kuwa meli ya Mv. Mbeya ilizama katika Ziwa Malawi na kwa kweli meli zimezama katika maziwa mengine makubwa ya Tanganyika na Victoria, na mimi kwenye Kampeni niliahidi kuwa nitanunua meli moja kwa kila ziwa,” alisema Rais Kikwete.

Aliongeza: “Tumeagiza meli tatu kutoka Korea Kusini, zinajengwa. Tumeagiza meli nyingine tatu kutoka Denmark. Nazo zinajengwa. Hivyo, tunaweza kupata siyo meli moja bali meli mbili katika maziwa yote matatu. Ni matumaini yangu kuwa nitaweza kuzizindua meli hizo kabla ya kumaliza kipindi changu cha uongozi, mwaka 2015.” HABARILEO.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari