CCM YAKOMALIA SERIKALI MBILI KATIKA BUNGE LA KATIBA MPYA.

Katibu wa Halmashauri Kuu ya Taifa, Itikadi na Uenezi, Nape Nauye.

DODOMA.
YAKIWA yamebaki masaa machache kabla ya Bunge Maalum la Katiba kuanza mjini hapa, Chama cha Mapinduzi kimesema kitaendelea kusisitiza mfumo wa serikali mbili kufuatia kikao cha siku mbili cha Halmashauri yake Kuu ya Taifa (NEC).

Kauli hiyo imetolewa na Katibu wa Itikadi na Uenezi wa CCM, Nape Nnauye alipokutana na wanahabari kuzungumzia changamoto mbalimbali zilizojitokeza katika mfumo wa sasa wa kiserikali.

“Changamoto zote tumezitafakari [tukaona] jibu lake sio serikali tatu,” alisisitiza Bw. Nnauye akiongeza “Bado sisi ni waumini wa serikali mbili.”

Hata hivyo, msemaji huyo wa CCM alikiri kuwa ili mfumo huu wa serikali mbili uendelee kufanya kazi, lazima baadhi ya mambo yabadilike. “Sio serikali mbili kama zilivyo sasa,” alisema.

Bw. Nnauye anaamini NEC imejiandaa vyema kuwasilisha hoja nzito zinazojibu maswali magumu kuhusu mapungufu ya utaratibu wa sasa wa serikali mbili.

Hata hivyo, hakuwa tayari kuzitaja hoja hizo, akisema zitawekwa wazi wakati wa Bunge la Katiba.

Kusikiliza kauli rasmi tazama VIDEO.