JAHAZI la Simba limezidi kwenda mrama baada ya kunyukwa 1-0 na Coastal Union, huku Azam ikijikita kileleni mwa msimamo wa Ligi Kuu kwa kuichapa Oljoro JKT kwa ushindi kama huo.Mashujaa wa Coastal Union walikuwa ni beki Hamad Juma mfungaji wa bao pekee dakika ya 45 kipindi cha kwanza pamoja na kipa chipukizi Fikirini Selemani aliyekuwa kikwazo kwa washambuliaji wa Simba.
Wakati hali ikiwa mbaya kwa Simba na pointi zake 36, mshambuliaji John Bocco aliihakikishia Azam pointi tatu muhimu kwa kufunga bao pekee dakika ya 72 na hivyo Azam kufikisha pointi 47, tano zaidi ya Yanga na Mbeya City zenye pointi 42 kila moja.
Uwanja wa Taifa; Mabingwa wa 1988, Coastal Union waliingia kwenye mchezo huo wakiwa na wachezaji wengi chipukizi huku nyota wake wote wakiwa nje kabisa.
Nyota wa Coastal waliokosa mchezo huo kwa sababu mbalimbali ni Haruna Moshi ‘Boban’, Juma Nyoso na Shaaban Kado.
Pamoja na kuwakosa nyota hao, Union walicheza kwa kujiamini zaidi katika muda wote wa mchezo huo, huku kipa Fikirini Selemani akionyesha umakini wa hali ya juu.
Washambuliaji wa Simba, Amis Tambwe, Ramadhani Singano, Haruna Chanongo walikosa kabisa mbinu za kuipenya ngome ya Coastal chini ya kipa Selemani.
Katika mechi hiyo mwamuzi Simon Mbelwa alimwuonyesha kadi ya njano, Henry Joseph kutokana na mchezo mbaya kabla ya kocha Logarusic kuamua kumtoa nje dakika 22 na kumwingiza Said Ndemla, huku Union nao walimpumzisha Ally Nassoro dakika ya 33 na kumwingiza Mohamed Mtindi.
Dakika ya 45, beki wa kulia wa Coastal Union, Hamad Juma aliifungia timu yake bao la kuongoza baada ya kupokea pasi safi ya Razack Khalfan.
Simba waliingia kipindi cha pili na presha zaidi, lakini mashuti mawili ya Jonas Mkude yaligonga mwamba, wakati Singano alipoteza nafasi ya kufunga dakika ya 90 akiwa yeye na kipa Fikirini.
Baada ya filimbi ya mwisho, Singano wakati anatoka kuelekea kwenye vyumba vya kubadilishia nguo alipiga teke mlango na kuvunja kioo.
Wakati anatoka kwenye vyumba Singano alisindikizwa na mabaunsa, huku pPolisi wakidai wameamua kutomkamata maeneo ya uwanjani kutokana kile kilichoelezwa kuepuka vurugu.MWANANCHI
0 comments:
Post a Comment