HOSPITALI YA TAIFA YA MUHIMBI KUANZA KUWABEBA WAGONJWA WA MITAANI

 

Hospitali ya Taifa ya Muhimbili (MNH), inatarajia kuanzisha kitengo cha magari ya kubebea wagonjwa (Ambulance) kwa ajili ya kubeba wagonjwa kutoka katika maeneo mbalimbali ya Jiji.


Hayo yalielezwa juzi na Mkurugenzi wa MNH, Dk. Hussein Kidanto, wakati wakisaini makubaliano ya kupokea msaada wa magari mawili ya kubebea wagonjwa kutoka kwa Balozi wa Japan nchini, Masaki Okada.

Pia, Balozi Okada, alitoa msaada wa mashine ya kukamulia mafuta ya Alizeti katika wilaya ya Chato mkoani Geita.

Dk. Kidanto, alisema kwa sasa hospitali hiyo ina gari moja la wagonjwa ambalo linashindwa kukusanya wagonjwa na kuwapeleka katika hospitali hiyo na chini ya kitengo hicho wataanza na magari 10.

“Tunaushukuru Ubalozi wa Japan kwa kutoa msaada huu, utakuwa mwanzo wa kuanzisha kitengo cha huduma ya magari ya wagonjwa ambacho tunakianzisha Muhimbili ili yaweze kuwabeba kutoka maeneo mbalimbali ya Jiji,” alisema Dk. Kidanto.

Alifafanua kuwa, magari hayo yataandikwa namba maalum za maeneo tofauti ya Jiji na yatabeba watu watakaopatwa na ugonjwa wa ghafla kama mama wajawazito, wenye magonjwa ya moyo na maengine kwa lengo la kuwafikisha hospitali wakiwa salama.

Kwa upande wake, Waziri wa Ujenzi, Dk. John Magufuli, ambaye pia ni Mbunge wa Chato, alimshukuru Balozi hiyo kwa kusaidia kutoa msaada huo wa magari ya wagonjwa pamoja na mashine ambayo aliiahidi kuitoa alipotembelea wilaya hiyo. CHANZO: NIPASHE

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari