UMITASHUMTA NGAZI YA MKOA WA MOROGORO KUTIMUA VUMBI JUNI 20, 2012 UWANJA WA JAMHURI.

Mlinzi wa timu ya soka ya darasa la tatu B shule ya msingi Bungo Manispaa ya Morogoro, Mikidadi Mtanda (9) kushoto akijaribu kumiliki mpira dhidi ya mshambuliaji wa timu ya darasa hilo A, Khalid Ramadhan (9) kulia wakati wa michezo baada ya kumalizika kwa mitihani ya madarasa kwa ajili ya kufunga shuleni ili wanafunzi kwenda likizo mkoani hapo.

MASHINDANO ya umoja wa michezo shule za msingi Tanzania (UMITASHUMTA) ngazi ya mkoa wa Morogoro 2012 ambayo yanashirikisha wanamichezo kutoka wilaya sita za mkoa huo yanaanza kutimua vumbi katika uwanja wa Jamhuri mjini hapa kesho.

Kaimu Afisa Michezo mkoa wa Morogoro, Asteria Mwang’ombe alisema kuwa mashindano hayo yanalengo kuibua na kuendeleza vipaji vya kila aina ya michezo ikiwemo na kuchagua wachezaji kwa ajili ya kuunda vikosi mbalimbali vya michezo ili kuweza kushiriki mashindano Umitashumta ngazi ya kanda Kibaha mkoani Pwani.

Mwang’ombe alisema kuwa katika mashindano hayo wilaya sita za mkoa huo tayari zimewasili katika Manispaa ya Morogoro kwa ajili ya michuano hiyo ikiwemo wilaya ya Kilosa, Mvomero, Ulanga, Morogoro Vijijini, Kilombero na mwenyeji Morogoro Manispaa ambapo washiriki watashindana katika michezo ya soka, netiboli, mbio za riadha kuanzia mita 100 hadi mita 3000, mpira wa wavu wavulana na wasichana, kurusha mitupo na kuruka pamoja na taaluma katika darasa la tatu hadi darasa la sita.

“licha ya kuwepo kwa michezo hiyo pia tuna wanamichezo wenye mahitaji maalumu katika michezo wa soka kati ya shule ya msingi Kilakala kitengo cha viziwi na wenzao wa kitengo cha viziwi shule ya msingi Kiwanja cha Ndege na maandalizi yote yamekamilika kwa ajili ya michezo hiyo" alisema Mwang'ombe.

Mwang’ombe ametoa wito kwa wakazi wa Manispaa ya Morogoro kujitokeza kwa wingi katika uwanja wa Jamhuri katika mashindano hayo ili kuweza kuona vipaji vya watoto wao katika michezo hiyo hufanyika kila mwaka.

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari