CAG AITWA PESA ZA KUBEBWA KWA VIROBA TFF

Mdhibiti na mkaguzi Mkuu wa Hesabu za Serikali (CAG), Ludovick Utouh.Rais wa Shirikisho la Soka Tanzania (TFF) Leodegar Tenga.

MBUNGE wa Viti Maalum, Philipa Mturano (Chadema), amelaani vikali utaratibu wa unaoendelea sasa katika ukusanyaji wa mapato kwenye Uwanja wa Taifa jijini Dar es Salaam na kumtaka Mkaguzi Mkuu wa Hesabu za Serikali (CAG) kufanya ukaguzi.

 

Huku akiwa ameshikilia nakala ya gazeti la NIPASHE la toleo la juzi iliyoonyesha hatari inayoifanya serikali kwa kuchukua fedha zake kwa malipo taslim na tena bila ulinzi kutoka kwenye ofisi za Shirikisho la Soka Tanzania (TFF) , mbunge huyo alisema ni vyema sasa kukafanyika ukaguzi ili kuhakikisha kuwa taratibu zinafuatwa.

 

Mbunge huyo aliongeza kuwa Manispaa ya Temeke ambayo uwanja huo upo, haijawahi kufaidika na tangu uwanja huo uanzishwe.

 

“Niliwahi kuwauliza wakurugenzi waliopita na waliopo wakanijibu kuwa hawapati kitu chochote kutoka kwenye uwanja huo. 

 

Inasikitisha sana... ninachoomba serikali itueleze na CAG afanye ukaguzi kwa kuwa hapa pana ufisadi,” alisema. 

 

Alikumbushia tukio la uporaji wa fedha zilizopatikana katika mechi ya kirafiki kati ya Black Leopards ya Afrika Kusini na Simba iliyofanyika Desemba 29, 2012 kwenye Uwanja wa Taifa jijini Dar es Salaam, na kusema kuwa lazima serikali iongeze umakini katika eneo hilo.

 

Akitoa ufafanuzi kuhusiana na suala hilo, Naibu Waziri wa Habari, Vijana, Utamaduni na Michezo, Amos Makalla, alisema fedha zote zinazopitia wizarani kwao hupelekwa kwenye mfuko mkuu wa serikali.

 

"Kwa hiyo fedha hizi zote hupeleka katika mfuko mkuu wa serikali... kwa hiyo Temeke wanapata kupitia kwenye mfuko mkuu wa serikali,” alisema.

 

Makalla aliongeza kuwa kwa takwimu walizonazo, upo uwazi wa mapato yanayotokana na Uwanja wa Taifa na kwamba, asilimia 15 ambayo serikali inapata uwanjani na asilimia 18 ya Kodi ya Ongezeko la Thamani (VAT) ni miongoni mwa mapato yanayokwenda katika mfuko mkuu serikalini.

 

“Mimi sitaki kufanyia kazi habari za magazeti... lakini nataka niseme kwamba kama jambo hilo lipo, sisi serikali tutandelea kulifuatilia,” alisema Makalla, akiongeza kuwa serikali imejipanga kudhibiti zaidi mapato kwa kubariki matumizi ya tiketi za elektroniki viwanjani.

 

Awali katika swali la msingi la mbunge huyo, alitaka kujua serikali inatoa kauli gani kuhusiana na kutonufaika na mapato kwa halmashauri ya Temeke?.

 

Aidha, alitaka kujua tangu uwanja huo uanze kutumika, serikali imepata kiasi gani na kati ya hayo, Manispaa ya Temeke imepata kiasi gani?.

 

Makala alisema Manispaa ya Temeke hunufaika kutokana na mapato yatokanayo na matumizi ya uwanja huo ambayo huingia kwenye mfuko mkuu wa Serikali.

 

"Mapato hayo yote hutumiwa na serikali katika kutoa huduma mbalimbali kwa wananchi wa Tanzania ikiwa ni pamoja na wa Manispaa ya Temeke,” alisema.

 

Tangu uwanja wa huo uanze kutumika Agosti, 2007 hadi Februari, 2013, makusanyo ya mapato yanayopitia wizarani ni asilimia 15 ya mapato baada ya kutoa VAT ambayo ni Sh. bilioni 1.533.

 

WABUNGE WAPONDA

Wakati huohuo, baadhi ya wabunge wamelalamikia mfumo wa ubebaji wa fedha za mapato yanayotokana na mechi zinazofanyika kwenye uwanja wa Taifa mjini Dar es Salaam kwa kuonya kuwa jambo hilo linahatarisha usalama wa wabebaji na pia fedha hizo.

 

Akizungumza na NIPASHE jana mjini hapa, Mbunge wa Kinondoni, Idd Azzan alisema kitendo cha kubeba fedha 'kienyeji' kinahatarisha maisha ya mbebaji na fedha za umma.

 

“Hiki si kitendo kizuri kabisa…na ili kuepukana na suala la ubebaji wa fedha kiholela mimi naona tiketi ziwe zinauzwa wiki moja kabla ya mechi ili fedha ziwekwe benki,” alisema.

Alisema utaratibu wa sasa wa kugawana mapato baada ya mechi kumalizika muda wa usiku si mzuri na tena ni wa hatari na hivyo, ni bora fedha hizo ziwe zinatunzwa na zigawanywe siku inayofuatwa.

 

Aliishauri serikali kujenga chumba maalum kwenye uwanja huo kwa ajili ya kutunza fedha hizo kuliko kuzigawa kwa wahusika baada ya mechi kumalizika.

 

Mbunge wa Mtera, Livingstone Lusinde alisema utaratibu wa kubeba fedha kienyeji ni wa hatari na unapaswa kuachwa.

 

“Kama ni kweli wanabeba mamilioni ya fedha kwenye mifuko, basi wanahatarisha maisha yao na usalama wa fedha wanazobeba,” alisema Lusinde.

 

Alisema  hali hiyo inaonyesha kuwa kuna mianya fulani ya kujenga njia ya kuziiba hizo fedha.

 

“Inatakiwa kuweka njia za kisasa za kubeba fedha kiusalama zaidi lakini kubeba fedha kwenye mfuko wa rambo si utaratibu mzuri… maana hata kama ni za kwao, sidhani kama wanaweza kuzibeba hivyo,” alisema.

CHANZO: NIPASHE

Share on Google Plus

About mtanda blog

Blogger maarufu nchini Tanzania na mwanahabari mkongwe kwenye Tasnia ya habari