Rabi Mola ya taala, mwenye kugawa ruzuku.
Kifo nguvu ya Jaala, hapindui mahuluku.
Kilichobaki ni sala, Gwamaka na mfaruku.
Kilio kule na huku, ametoweka Bukuku.
Uhai kweli amali, Miruko siyo njuluku.
Siri kubwa ya Jalali, penye wema na kuduku.
Haina dawa ajali, Kejo Ngeta fukufuku.
Kilio kule na huku, ametoweka Bukuku.
Mtu asiye makuu, ubazazi wala chuku.
Maki na Jube nukuu, hapendi mtafaruku.
Hayupo kaitwa juu, tumenyang`anywa shauku.
Kilio kule na huku, ametoweka Bukuku.
Imetupata fadhaa, akili kama chibuku.
Tunaishi na balaa, kiangazi na kifuku.
Wametupora shujaa, kafichwa kwenye sanduku,
Kilio kule na huku, ametoweka Bukuku.
Huzuni ya gardiani, imenyongonyea muku.
Picha zenye burudani, zimekatika mkuku.
Kanyamaza mwenye fani, Kwangu mimi zumbukuku.
Kilio kule na huku, ametoweka Bukuku.
Simanzi Nyombwe Himidi, Nsubi roho dukuduku.
Mauti kitu hasidi, mzingile kama luku.
Kapoteza zumaridi, thamani ya burubuku.
Kilio kule na huku, ametoweka Bukuku.
Edwini na Majira, yowe kuliko kasuku.
Ozi zimekosa dira, hakuchezeki kiduku.
Lila yao ya fikira, imepigwa marufuku.
Kilio kule na huku, ametoweka Bukuku.
Mbele yake nyuma yetu, sifa nimemtunuku.
Wamevunja jembe letu, tumelishwa chukuchuku.
Kapwaga kipenzi chetu, Mgamba ana kikuku.
Kilio kule na huku, ametoweka Bukuku.
HN (MJUKUU WA MTUME)
DAR ES SALAAM 12:27:2016
0 comments:
Post a Comment