Msanii wa muziki wa Bongo Flava, Michael Mhina “John Walker” amefariki dunia, familia yake yathibitisha. Akizungumza na Mwananchi Digital kwa njia ya simu leo asubuhi, baba mzazi wa msanii huyo, Denis Mhina amesema mwanae amefariki Hospitali ya Taifa Muhimbili jijini Dar e Salaam, usiku wa kuamkia leo.
Walker ambaye alikuwa msanii wa kundi la Watukutu alikimbizwa hospitalini hapo mara baada ya kuangukiwa na mtungi wa gesi ambao ulimchoma kichwani wakati akitengeneza gari lake.
“Hivi sasa tupo Muhimbili tunafuatilia taratibu kadhaa hapa. Tukimaliza tutauacha mwili hapa (hospitalini) na kurudi Ilala Bungoni ambapo ndipo tulipoweka msiba,” baba wa marehemu amesema.
Hata hivyo, Mhina amesema kuwa mwili wa Walker utasafirishwa mkoani Tanga kesho na kuzikwa Kigongoi, wilayani Mkinga Alhamisi.
Naye Rais wa Shirikisho la Muziki nchini, Addo Novemba amesema kuwa wasanii wamesikitishwa na msiba huo na sasa wanajipanga kushirikiana na familia ya marehemu kuusafirisha mwili huo kwenda Tanga.
“Tunatoka msibani muda huu (leo asubuhi), msiba upo Ilala Bungoni. Hatuna taarifa rasmi japokuwa kuna uwezekano wa kusafirisha mwili kesho kwenda Tanga,” Novemba amesema.
Rais huyo amesema kuwa wasanii walikuwa wameshaanza kukusanya fedha za kumsaidia marehemu na hadi jana jioni, kiasi cha Sh.1.1 milioni kilikuwa kimekwishapatikana.
Marehemu ameacha mke na motto mmoja.MWANANCHI DIGITAL
0 comments:
Post a Comment